Oscar Wilde nació en Dublín el 15 d’ochobre de 1854 y morrió en París en 1900. Ye ún de los escritores más representativos de la Europa d’a finales del sieglu XIX. «La importancia de ser Severu», obra teatral escrita siendo yá una celebridá en Londres ye la so obra maestra. Estrenada en 1895, él mesmu definióla como «una comedia trivial pa xente serio». Derroche d’intriga y chispeante diálogu, la versión asturiana de Lluís Aique Iglesias caltién l’estilu elegante del orixinal inglés y apurre una ferramienta afayadiza pa la xente de teatru asturiano.

El protagonista d'esti cuentu ye un mostruu que vive nun planeta llonxanu y que tien un suañu: convertise n'esplorador intergalácticu. Con esti enfotu entra a trabayar d'ayudante de carpinteru p'aforrar lo bastante y mercar un platillu, anque seya de segunda mano. El primer viaxe que fai va a tar enllén d'aventures, sobremanera cuando namás despegar sufra una avería.Enrique Carballeira ye ún de los escritores asturianos más reconocíos nel campu de la lliteratura pa neños. Nació nel Infiestu, onde vive, en 1970. Sigue trabayando na radio y poco a poco va faciendo y publicando llibros que de xuro yá conoceis: «El cuélebre y l'home l'espaciu» (1991), «El principín medranosu» (1992), «El gaiteru de Sotu» (1993), «Les aventures de Xaime Bon, detective galácticu» (1995), «Un carbayu cocoteru» (1996) y «Tres hestories de Ñublina más una de propina» (1996). Dibuxa hestories nel periódicu de cómic «El Gomeru», n'«El Fielatu», fai carteles...

La traxedia del viaxante de comerciu Willy Loman, fecha de madiocridá y equivocaciones testerones, espeya tamién el fracasu de la pequeña clase media norteamericana, atrapada ente los suaños y la dura realidá diaria. Arthur Miller foi, quiciabes, el más agudu observador d'esi conxuntu de ciudadanos anónimos que viven nos suburbios, trabayen y esperen de continuo un ésitu quiméricu que siempre ye pa otros. Y «Muerte d'un viaxante» ye acasu la so obra másima, un testu qu'inauguró una nueva época na escena del so país y que conserva anguaño la so estraña belleza manchada de grisura y melancolía.

Borsalino ye un neñu que vive nel planeta Tierra nel sieglu XXII. La so mayor afición ye leer llibros antiguos, impresos en papel, y nun-y presten nada los llibros en disquín de computadora. Borsalino ye un neñu fuera d'época, lo que lu convierte en firme candidatu pal tratamientu cola máquina de camudar, cola que se tresforma'l celebru de los que son distintos. La única posibilidá d'escapar ye marchar col cometa Halley de la que pasa cerca de la Tierra.Enrique Carballeira ye ún de los escritores asturianos más reconocíos nel campu de la lliteratura pa neños. Nació nel Infiestu, onde vive, en 1970. Sigue trabayando na radio y poco a poco va faciendo y publicando llibros que de xuro yá conocéis: «El cuélebre y l'home l'espaciu» (1991), «El principín medranosu» (1992), «El gaiteru de Sotu» (1993), «Les aventures de Xaime Bon, detective galácticu» (1995), «Un carbayu cocoteru» (1996) y «Tres hestories de Ñublina más una de propina» (1996). Dibuxa hestories nel periódicu de cómic «El Gomeru», n'«El Fielatu», fai carteles...

Miguel Rojo (Zarracín, Tinéu, 1957) ye, probablemente, el narrador de más ésitu de los que se dieron a conocer a partir del llamáu Resurdimientu de los años 70. En Bilbao: Estación terminal retoma l’impulsu del so anterior poemariu, «Buscador d’estrel.las», pa trazar la periperica vital y intimista d’un home que suaña, ama, viaxa y sufre colos güeyos bien abiertos. Un puñáu de poemes en busca del so llector.

Segunda entrega del llibru secretu de la biesca, nesta ocasión dedicáu a investigar y estudiar les güelgues que s’atopen na biesca. Un llibru bien entreteníu y mui instructivu.

Esti llibru, escritu per un profesor al que-y presta l'axedrez y enfocáu especialmente pa que seya usáu na escuela, ta pensáu pa que los nenos más pequeños puedan deprender los aspectos básicos del xuegu ensin nenguna dificultá, enredando. Nun se deprende a desarrollar una partida, sinón coses tan cencielles como lo que ye'l tableru, el movimientu de les pieces o el xaque mate dende una óptica práctica, que ye a lo que van enfocaos los más de cientu cincuenta exercicios axedrecísticos y pedagóxicos que tien. La traducción ye d'Ana lópez Isla.

El primer llibru n’asturianu de José Luis Rendueles atropa, baxo’l suxerente títulu de «Cuentos chinos», un total de trece relatos d’estremada temática pero d’igual calidá y altor narrativu.Dalgunos de los personaxes que desfilen per estos cuentos formen parte de lleendes de la tradición oral y de la mitoloxía asturiana o universal, pero l’autor revísalos unes veces y otres reinvéntalos p’adaptalos a una postmodernidá descreída y ensin tiempu pa que-y cuenten cuentos (la serena, la muerte, los cuentos tradicionales de fades...).D’otru llau, con un acertáu usu del realismu máxicu, José Luis Rendueles reescribe cachos de la vida de dellos personaxes bíblicos y históricos de gran sonadía, trataos a vegaes con cierta irreverencia (Xulio César, Llázaro, Lot...).Dientro de la gran variedá de temes y rexistros, nun escaez Rendueles l’averamientu a una sociedá post industrial, asitiada na muerte y desolación, falta de futuru, maxistralmente retratada na so violencia contenida que, dacuando, españa y surde imparable.JOSÉ LUIS RENDUELES, nacíu en Xixón en 1972, escritor yá conocíu en castellán, llingua na que publicó en 1998 dos llibros, «Ultrajes», de poesía, y «Historias de Comarca», de narrativa, recibió varios premios como narrador n’asturianu, que queden recoyíos nel presente volume. Como poeta, tamién n’asturianu, ta acabante algamar el premiu «Xuan María Acebal» 2001 col llibru «La casería.»

Cada vez que'l «cipayu» capitán Argüelles siente la pregunta «Y bien, capitán, ¿quién manda agora nes Españes?», sabe que detrás d'esa voz ta l'odiáu don Diego del Valle, el cabezaleru carlista emboscáu nos montes de Peladura, qu'ataca una y otra vuelta'l pueblu de Santandrés, el mesmu que lu viera nacer.Al rodiu de don Diego y del sobrín, Miguel Martínez de la Vega, Xandru Fernández compón esta espléndida novela histórica na que sabe conxugar la escaramuza bélica, centrada na última guerra carlista, col drama d'una saga familiar enfrentada, enllena d'escuros y tráxicos secretos que la narración va desvelando, nuna obra mui bien estructurada y desenrollada con axilidá y soltura.La bayura de personaxes –históricos unos, de ficción otros–, les sos acciones, contradicciones, pruyimientos y deseos vienen a dibuxanos un mundu nel que'l ser humanu nun ye, les más de les veces, amu y señor del so destín, y la verdá albídrase como una llinia borrinosa y malapenes percibible, nunca d'una pieza.Esta escelente novela trata un tema cásique escaecíu de la historia d'Asturies: la participación de bien d'asturianos nes guerres carlistes qu'hubo nel llargu periodu de 1833 a 1876.Xandru Fernández (Turón, 1970), narrador, traductor y poeta, tien publicaos dellos títulos esenciales, tanto en prosa como en versu, de la Iliteratura asturiana, la mayor parte en Trabe.

Humberto González (Figareo, Mieres, 1961) ye ún de los poetes n'asturianu más prolíficos y nel que más claramente se pue siguir una evolución que va del tonu surrealista de los primeros versos (Augua d'invocación, que ye de 1988) a un ciertu clasicismu de los postreros llibros. L'usu de metros o formes estrófiques tradicionales (sonetos especialmente) complétase con una mayor claridá espresiva, anque caltién la mesma bayura lésica y ciertos elementos irracionales. «De nueche y agua», un estensu llibru de poemes, ta dividíu en cuatro estayes qu'espresen cada una los pruyimientos básicos y xenerales del xéneru humano: la vida y el pasu del tiempu, l'amor, el deseyu y la muerte. Nelli atopamos sonetos de corte clásicu nos que l'amor, trescaláu de señaldá, adquier sonoridá y trescendencia, alcontramos tamién poemes curtios, de pincelada rápida, versos como fogaraes que falen del deseyu, trespasaos d'erotismu y sensualidá y que n'ocasiones nos empobinen a les fontes más pures de San Xuan de la Cruz. D'otramiente conviven poemes descriptivos, paisaxísticos, xunta aquellos nos que l'autor s'entruga con duce tristeza polos caminos de la muerte y la rara materia de lo que tán feches les persones. Cola parte tercera d'esti llibru, «Poemes d'amor y desaliendu», Humberto González ganó'l sestu certame lliterariu «Vital Aza» de poesía, que convoca l'Ayuntamientu de Llena. En TRABE publicó, hasta agora, otros dos llibros de poesía: Ámbitu elemental (1997) y Les esferes del tiempu (1998).