Naide como Xandru Fernández pa recrear, dende un estilu lliterariu inconfundible y personal, la derrota d'un mundu, nin rural nin urbanu, productu d'una descomanada industrialización selvaxe que yá nun rinde beneficios y que s'apaga inevitablemente col mileniu. Personaxe a personaxe, mientres los vemos facese o desfacese nestos quince relatos, l'autor va dándonos la so visión d'una sociedá que termina'l so ciclu vital y taramiella enantes de cayer quiciabes definitivamente. Xandru Fernández (Turón, 1970) tien publicaos tres llibros de poesía (l'últimu «Lletra muerto», en 1998, editáu por Trabe), dos noveles curties y una llarga, «El club de los inocentes» (1994), premiu «Xosefa de Xovellanos».

Telva ye la única nena que vive en Villar. Nun tien amigos en pueblu, pero los mayores nun dan abastu a da-y mimos. Tolos díes va pa escuela andando. Pero güei va topar una sorpresa: una osa que cayó nuna garduña. Telva nun sabía qu'había cazadores furtivos, nin el mal que tán faciendo a los osos.

Xandru Fernández (Turón, 1970) publicaba en 1990 el so primer llibru de poemes, «Primer bestiariu», entamando un camín que, de momentu, paez quedar peslláu cola publicación de «Lletra muerto» (1998, premiu «Elvira Castañón» de poesía). En 1993 apaecía en Trabe «Breviariu de la diáspora», un llibru densu, ricu, que bebía no meyor de la tradición surrealista pa falar de los temes preferíos de tola poesía: amor y desalcuentru. Nestos años Xandru Fernández foi publicando una amplia obra narrativa: «El silenciu en fuga» (1990, premiu de «Novela Curtia»,), «Tráficu de cuerpos» (1990), «El club de los inocentes» (1994, premiu «Xosefa de Xovellanos» de novela) y el llibru de cuentos «Del llaberintu al trenta» (Trabe, 1995). D'entós p'acá la so obra aumentó considerablemente.