Un viaxeru solitariu guárdase nos cafés, nos llibros, nos trenes, nes ilesies y monumentos, y nes notes qu'apunta nun cuadernu. Notes que falen de les contradicciones ente'l ser, el deber ser y el querer ser; apuntes que describen el deséu furtivu y fugaz de dir tres d'un desconocíu qu'acaba d'invitanos –con una mirada– a una vida nueva; del deséu que ñaz, medra y amustia cola facilidá cola que un día soleyeru se tapa ente nubes repentines.Henrique G. Facuriella comparte los sos pensamientos d'apátrida de sigo mesmu nun llibru nel que brilla la fondura de la soledá y la presencia de lo ausente, la llucha dura de los distintos «yos», la dificultá de los tránsitos d'un home que se pierde a cada pasu y s'atopa na amistá y na busca de sitios p'amar. Asistimos al procesu de dibuxar un planu inútil pa movese per un tarrén siempre cambiante, pa comprender un territoriu en formación.

«La confesión xeneral», última novela de Xuan Bello, puede lleese en clave de thriller; un thriller metafísicu, sicasí, nel que cada páxina ta escrita con conciencia d'artista. El personaxe de la novela, Andrés Parrondo, pescuda nel ciernu del so ser en procura d'esplicaciones que nun atopa na realidá mentes desempeña un llabor bien raru. Estrañamientu y alucinación, aventura y renuncia de l'aventura, Bello, nesta ocasión nun refuga de la tradición kafkiana (vía Dino Buzzati) pa esplorar les consecuencies de les relaciones humanes nun recorríu que daqué tien d'órficu y onde se configura un universu peculiar definíu pola metáfora esencial del laberintu de la conciencia.Xuan Bello (Paniceiros, 1965) ye escritor y periodista. Ente la so obra lliteraria última destaca la «Historia universal de Paniceiros», «Los cuarteles de la memoria», «La historia tapecida», «La nieve y otros complementos circustanciales» y «Al dios del llugar».

Marta Mori, poeta ganadora dos veces d'un premiu tan prestixosu como'l «Teodoro Cuesta», adiéntrase nel territoriu de la narrativa con una maestría espléndida, creando unos personaxes rotundos y recreando unes atmósferes envolventes. Bona conocedora del oficiu d'escritora, Mori llévanos na primer parte d'esti llibru al Xixón de la Guerra Civil y respíganos al recordanos que naquella guerra –como en toes– hai tantes maneres de perder la vida como de ganala, que los destinos de carceleru y condenáu pueden cambiase, y que'l recuerdu ye'l dolor o l'allegría indeleble. Nuna segunda parte la escritora fai con un aciertu y naturalidá almirables un cantu a los distintos, a les vivencies particulares y intimistes que la soledá o l'angustia orixinen nuna neña, nuna familia, o nuna sociedá entera, componiendo unos cuentos onde una rica prosa poética va llevar a la llectora y al llector hasta'l complexu, y cada día más escasu, disfrute de lo aunténtico.

Depués de a perbona acoyida que tuvieron les «Primeres llecciones d´asturianu», espublizaes nel añu 2003, yera una necesidá amesta-yos un segundu volume que completara´l nivel formativu propuestu nelles, de manera que´l llector interesáu n'afondar nel conocimientu y usu correctu del asturianu trabaye con una ferramienta amañosa y pedagóxica a un tiempu. Ramón d´Andrés, miembru de númberu de l´Academia de la Llingua Asturiana y profesor titular de Filoloxía Española y Asturiana de la Universidá d´Uviéu, ofrez nestes llecciones d´asturianu un métodu dirixíu a tolos públicos (enseñantes, escritores, funcionarios, periodistes, estudiantes, investigadores y la ciudadanía en xeneral) onde´l datu precisu s´ilustra, de forma amena, con bien d´exemplos.

Normativizar una llingua ye da-y normes prescriptives (ortográfiques, gramaticales, léxiques y ortolóxiques) que faigan posible usala como instrumentu de comunicación formal. Nos años 70 del sieglu xx l'asturianu entamó un procesu de normativización qu'agora ta mui trabayáu en munchos aspectos, pero que tien importantes cuestiones pendientes relacionaes col usu prácticu n'ámbitos formales como'l periodísticu, el xurídicu, el lliterariu, el científicu y tantos otros.Esti llibru quier ser una esposición constructiva alredor d'eses cuestiones pendientes, presentando los problemes y dexando víes de solución abiertes. Tóquense, asina, temes como la necesidá d'una normativa falada (ortoloxía), el tratamientu de les variedaes xeográfiques del asturianu, l'adaptación de los topónimos esteriores, l'adaptación de palabres foranes y tecnicismos, etc., ensin escaecer el repasu a delles cuestiones teóriques d'interés pal especialista.

«Rockmería» ye un llibru onde se repasen dellos de los soníos más significaos nes músiques populares. Al traviés de les sos páxines descubrimos estilos como'l folk-rock inglés, el ska xamaicanu, el raï de la Kabilia, el zydeco de Luisiana, el rock del este d’Europa, el Rock Bravú de Galicia, o’l Rock Radikal Vascu ente munchos otros. Esti llibru tien un carácter divulgativu, asequible pa toes aquelles persones que quieran adientrase per delles de les músiques populares más prestoses del sieglu XX.

Una de les meyores coses del branu ye tener vagar pa dedicase a los placeres y escaecer les obligaciones, el trabayu intensu, la rutina, el fríu y la escuridá del inviernu. De les munches coses que se puen facer nel mes d'agostu, una bien prestosa ye dedicase a la llectura.«Cuentos pal mes d'agostu» son doce narraciones imprescindibles formaes por dalgunos de los nomes más importantes de la nuestra lliteratura (Berta Piñán, Miguel Rojo, Esther Prieto, Antón García, Paula Pulgar Alves...). Doce cuentos intensos y redondos como'l sol braniegu.

Sorprender un instante, y dexalu quietu na inquieta harmonía, son característiques comunes a dos disciplines mui diferentes: la fotografía y la prosa poética. En «L’alma robada», Pablo Texón amuesa toles sos habilidaes al acudir dacuando al rellumu poéticu intelixente, dacuando a la ocurrencia refexiva. Son testos qu’aspiren a descubrir la verdá interior de les coses. Al partir de les fotografíes magnífiques de Mario Rojas y Pablo Lorenzana, Texón fai que veamos más adientru. Existe una lluz intuitiva que rescampla na so prosa, una lluz que proyeuta una solombra: la intelixencia.

La maxa precisa ya contenida de la prosa cuidada de Roberto González-Quevedo atopa nesta nueva entrega narrativa, que sigue en tonu ya emoción a «El Sil que baxaba de la nieve», 2007 y que nun oculta lo autobiográfico, el l.lugar del milagru. La relación del home col paisaxe, las meticulosas indagaciones no pasáu, estoupan nuna l.lingua sabia ya bien feita que funciona eiquí como bóveda d'evocaciones.

Manu ya Naciu son dous nenos que viven na ciudá, pero van muito al pueblu. Sou buelu tien al.lí vacas ya por eso saben d´óu vien el l.leite de bolsa ya hasta probaron a muñir una vaca ya vieron un xatín mamar… Si s´acaba la yerba, los nenos ofrécenl.ly a sou buelu l.levar las vacas a un prau qu´hai na escuela. Ya un día, cuando chegan los nenos al patiu, ¡la escuela ta chena de vacas ya conas l.luecas ya las campanas nun hai quien dea clase! D`esto ya de más fálannos Manu ya Naciu nesta obrina de teatru qu´escribíu Naciu´i Riguilón ya ilustranon los sous fichos.