Marta perdió les coletes de tar percontenta. Los sos pas van llevala a un centru comercial a cortar el pelu, algo que a Marta nun-y presta ni gota. Nesta aventura arreglaráseles, hasta lluchando con cuélebres, pa que nun-y lo corten.

Esti llibru representa'l primer averamientu académicu a la historia de la televisión n'Asturies dende la llegada de la señal de TVE a mediaos del sieglu XX hasta'l nacimientu del serviciu audiovisual autonómicu nel XXI. L'autor, que contestualiza l'análisis esplicando lo qu'asocedía en cada momentu históricu nel ámbitu español y européu, repara con detalle nos años ochenta, noventa y 2000.Cristóbal Ruitiña (Cangas del Narcea, 1977), doctor en comunicación pola Universidá d'Uviéu y llicenciáu en Periodismu pola UAB ye profesor de la Facultá de Ciencies de la Comunicación de la Universidá Camilo José Cela de Madrid y redactor por oposición de RTPA.

Ucrania ye un país. Un país que tien un nome, que ta habitáu por xente amigo, y otro non tanto, que tien una historia y, seguramente, un futuru. Eso ye «Ucrania y otros nomes de muyer». Países de los que conocemos fechos trescendentales que cambien el rumbu de les trayectories vitales pa siempre. Hai un momentu nel que dalgo o daquién ruempe. Esa xente, lo que protagonizó’l socedíu, dacuando nun se da cuenta nesi instante de que too cambió, de que va cambiar y nada va volver a ser como enantes. Pero pasa.Estes xeografíes con nome femenín constrúinse nun mapa trazáu d’esperances, soledaes, trabayu, frustración, dolor y rellumos de felicidá. Son vides de muyeres. Muyeres qu’avecen a ser complementos circunstanciales del rellatu principal y que nesta ocasión, dende’l so destierru involuntariu de les coses importantes, enséñennos les coses que realmente tienen importancia. Trátase de vivir y facelo caúna lo meyor que pue colo que-y tocó en suerte o en desgracia.

La novela «La confesión de Lúcio» ta considerada por dellos críticos como la obra mestra del escritor Mário de Sá-Carneiro (Lisboa, 1890-París, 1916). L'enfotu del narrador, Lúcio Vaz, ye demostrar qu'él nun mató al escritor Ricardo de Loureiro, y, pa consiguilo, afirma que va dicir namás que «la verdá» hasta cuando ella sía «inverosímil».Mário de Sá-Carneiro foi ún de los mayores esponentes del modernismu lliterariu portugués y miembru, xunto con Fernando Pessoa o José Almada Negreiros, del grupu fundador de la revista «Orpheu». Sicasí, la so angustia vital, la insatisfación crónica pa cola so propia existencia y la dificultá pa facese entender poles persones que lu arrodiaben –tres rasgos que comparte colos protagonistes d'esti llibru– llevaron a Mário de Sá-Carneiro al suicidiu nel Hotel de Nice de Montmartre cuando tenía namás que venticinco años.

¿Cómo ye posible que depués d'un sieglu de Llingüística científica tovía hai un refileru de conocencies elementales del llinguaxe y les llingües que nun s'asentaron na cultura xeneral de la xente y élites cultivaes? ¿Cómo ye posible que tantos prexuicios, falses creyencies y supersticiones llingüístiques sigan tovía tan estendíes na nuestra sociedá, mesmamente cola complacencia d'una bona parte de llingüistes profesionales, que descuiden asina la so ética intelectual? Estes son delles de les cuestiones presentes nos 52 escritos que componen esti llibru, a manera de glayíu reivindicativu del conocimientu científicu nel terrén del llinguaxe y de les llingües.Ramón d'Andrés (Madrid, 1959), profesor titular de Llingua Española y Llingua Asturiana na Universidá d'Uviéu, ye autor d'abondes obres d'investigación y divulgación alredor del asturianu y la diversidá llingüística.

«Londres nevao» ye un llibru formáu por seis rellatos que tienen en común l’ambientación nel iviernu, la confusión ente narrador y autor y la descripción sicolóxica de los personaxes al traviés de los detalles pequeños. La traducción de Ramón d’Andrés dexa tresllucir mui bien la riqueza léxica abondosa y l’estilu pulíu del orixinal catalán. Periodismu, narrativa, poesía y crítica lliteraría son los xéneros nos que trabaya Jordi Llavina, ún de los referentes de la lliteratura actual en catalán. L’autor barcelonés diose a conocer nel 2001 al ganar, cola novela Nitrato de Chile, el premiu Josep Pla, ún de los de más sonadía de les lletres catalanes.

Paula Pulgar Alves debuta na lliteratura asturiana con una colección de cuentos onde personaxes comunes s'enfrenten, de repente, a situaciones especiales, situaciones que –d'una manera o otra– van cambiar les sos vides: los detonantes son tan variaos y a la vez tan naturales como ye l'amanecer de cada día nuevu. El pesu insoportable de la rutina, el desdén sexual incontenible, los celos vengatibles, xuegos de neños inocentes y crueles, asesinatos casuales y otros macabros, pantasmes entrañables, soledaes del alma y padecimientos del cuerpu, premoniciones, adulterios, un recuerdu dulce de la infancia...Dotada d'una gran facilidá pa la narración, Paula Pulgar Alves va sorprender a la llectora y al llector con argumentos construíos cola fuerza de lo auténtico y tamién de lo fantástico.

Esti llibru nun ye exactamente una antoloxía de poemes traducíos, infiel y llibremente, por Xuan Bello. Como yá fixera n'otres ocasiones, l'autor de Paniceiros garra de base un testu ayenu pa configurar lo que bien se pueden considerar retayos de la propia obra. Estos testos nun aspiren a la perfección filolóxica, anque nun se safen d'ella; primordialmente seique procuren esplicar, a la so manera, esi misteriu insondable que ye la poesía. Un misteriu , en tou casu, que tien que ver cola complexidá moral cuándo del traductor, cuándo del traducíu. Carl Sandburg, Tonino Guerra, Adam Zagajewski, Vladimirr Holan, William Heinesen, Anna Akmátova, Mary Oliver, Ángel González...

No existen demasiadas obras que aborden la experiencia empresarial desde dentro; en primera persona. Y es comprensible: no es una tarea fácil. Ser jefe no está bien visto. Tener responsabilidades, asumir riesgos y equivocarse no tiene buena prensa. Acertar, tampoco. Y triunfar... triunfar, muchísimo menos. Por eso es interesante esta versión de los hechos desde el punto de vista de un empresario. Porque no es algo que se suela hacer todos los días. Y porque, además, con este libro, Iglesias demuestra cómo se pueden abordar, de una manera fresca y sencilla, temas que son realmente complicados.«Soy empresario, lo confieso», está dividido en cuatro partes: Historias de amor, Contra el inmovilismo, Discurso en positivo y De nosotros depende. En las cuatro se enfoca, desde distintos puntos de vista, el fenómeno empresarial como lo que es: una aventura a dos bandas entre unas personas y un proyecto.Inaciu Iglesias (Uviéu, 1966) es empresario y autor de otros títulos como «Dar la cara», «Independencia», «La identidá asturiana» o «Historia de VIR».

Tercer entrega de les aventures de Tela, Tila y Tula. Nesta tercer entrega los llectores van descubrir por qué del sombreru de Tila nun sal nada, amás de conocer la historia d’Urbano, un ratu mui especial que tien una fame salvaxe y que, al final, resulta nun ser un ratu.