Una cosa ye tener fe en Dios y otra saber cómo ye de firme esa fe. El protagonista de la novela foi quien a sabelo depués de sobreponese a una riestra de situaciones vitales a les que se tuvo qu'enfrentar con una fuerza "sobrenatural". Naciu Varillas, valor seguru de la lliteratura asturiana, crea nesta obra con prosa seductora una atmósfera anglosaxona, na que personaxes valientes tienen que vivir nel cantu onde entama l'abismu.

Nunca vuela llonxe de les fontes de la vida nin tampouco esquiva'l vértigu de lo insondable. Quien xurga nel enigma ensin respuesta de la muerte, atoupa, dacuandu, faloupos de consuelu sobre la negra tierra. Nestas narraciones, tan naturalmente axeitadas, escritas con rigor de reloxeiru, Roberto González-Quevedo recobra, peneirada pola reflexón ya la conocencia de los anos, aquel.la voz que deslumbrara pola sua estraña precisión en «Pol sendeiru la nueite». Nesti l.libru sobrenala, sul.lagándolo tou en tolos cuentos, la convicción de que nun muerre'l mundu dafeitu entrín ya non nun mueiran, no ciernu del alma, las palabras

Un publicitariu con munchu éxitu profesional y una guapa familia ve cómo na so vida llaboral apaecen un ayudante que gasta una eficacia increíble y una rapaza cola que vivió una aventura estramatrimonial. Estos dos elementos faen qu'esti executivu, home seguru, competitivu, equilibráu y avezáu a disfrutar siempre del trunfu se vea metíu en dellos reveses colos que nun contaba. José Ángel Gayol preséntase como narrador en llingua asturiana con esta rica y ellaborada obra que promete una trayectoria fulgurante.

Toles hestories tienen una hestoria tapecida, escondida: esto ye lo que se demuestra nesta serie de ficciones, afilvanaes nel fusu d´una mesma obsesión, onde la confidencia cortés se tresforma, de dalguna manera, en delación: cuéntase, por acio d´una tresparencia indebida, incluso lo que nun se quier contar. Escrita cola retórica de los tímidos, cola pasión de los que piensen que la frase dicha en solución d´harmonía equilibra´l caos del mundu, esta nueva entrega de Xuan Bello –difícilmente clasificable xenéricamente, pero que raspia conscientemente les estayes irreales de la novela– vuelve a plantear, col rigor del vivisector, la paradoxa de quien sabe que pertenez a una tierra onde yá nada-y pertenez.

Persones que cambien de bandu por ser lleales a elles mesmes nel momentu precisu nel que pierden la fe, una estancia nun llugar del Bierzo, la sombra inquietante de la muerte, la tentativa del misteriu, la pasión pola lliteratura... Estos son dalgunos de los ingredientes d´esta obra poblada de pantasmes –reales y imaxinarios, vivíos y lleíos– que nun ha dexar indiferente, de nenguna manera, al llecto

«Al dios del llugar» ye`l primer llibru que Xuan Bello dedica n`esclusiva a falar d'Uviéu, a contanos les histories que la ciudá escuende, a dar voz a esos personaxes carbayones que, arimaos a la barra de cualquier chigre, componen l`alma viva del cachu de mundu que puede vese dende la pica de la torre de la catedral.

La reina Armanda quier casar al fíu pero nun-y val cualquiera pa moza d'él. Quierla que sepa cocinar, llavar y coser pantalones, anque al príncipe too eso da-e igual. Cuando la reina convoca a les candidates namás se presenta una… ¡y con una espada al cintu!

«El país del silenciu» ye un ensayu documental que rellata en capítulos independientes la vida de muyeres asturianes nacíes a partir de 1910, centrándose nes sos esperiencies de la Guerra Civil: ónde la vivieron, cuál foi'l papel qu'elles y les sos families xugaron nel conflictu y cómo influyó ésti nel desarrollu de la so vida. Los testimonios tán recoyíos en dellos puntos del territoriu: centru, oriente y occidente, pa dar asina una estampa de cómo se vivió'l conflictu en caúna de les zones.beatriz R. Viado (El Remediu, Nava, 1976) ye directora del selmanariu Les Noticies y Vanessa Gutiérrez (Urbiés, Mieres, 1980) ye escritora y periodista.

Los protagonistes d'estos cuentos de Cristina Muñiz son héroes anónimos que llevanten la bandera del inconformismu énte un destín –non deseáu– ordenáu por otros. Son muyeres y homes comunes qu'entamen una llucha, individual o colectiva, por salvase, por salvar la pareya, por sobrevivir a la crisis o por vencer a la inxusticia o la decepción.

Xusto al pie del agua del emblase había un árbol. Un árbol mui grande, el más grande de la rodiada. Taba separáu de los otros árboles de la so especie, más pequeños y que vivíen unos metros per detrás, formando una matuca pequeña.

Héctor Pérez Iglesias axunta en «Desinencies» una escoyeta de quince cuentos escritos nestos últimos años. Nellos rescampla la vocación d’atopar la palabra bien dicha y trazar histories onde s’aldovinen esperiencies vivíes y sentíes nun mundu rural que l’autor conoz bien. N’otros rellatos, Pérez Iglesias adiéntrase nos territorios de la ficción más imaxinativa, dende la lleenda hasta les histories de carácter fantásticu. Nestos testos, l’escritor, una de les promeses más sólides de la lliteratura asturiana, xuega coles formes y los xéneros pa dar acoyida al humor, l’esperimentalismu o la narración infantil.«Desinencies» supón, amás, la estrena na prosa d’un autor qu’hasta agora yá llamara l’atención pol so dominiu del llinguaxe poéticu –bien presente polo demás en munchos d’estos rellatos–, que yá-y valió premios tan prestixosos como’l Teodoro Cuesta, col poemariu «Como crecieres tu», el Fernán Coronas, por «Lo peor del bon tiempu», o’l Nené Losada Rico. Con «Desinencies», Pérez Iglesias confírmase como ún de los valores más firmes d’una xeneración nueva que ta pidiendo pasu nel panorama de les lletres asturianes.