Ebenezer Scrooge, usureru avaru y retorcíu, va recibir la nueche de Navidá una visita inesperada: tres espíritus qu'habrán enseña-y lo que foi, lo que ye y lo que pue ser la so vida si nun cambia de vezos. Nun llargu viaxe espectral, que será en ciertu mou iniciáticu, Scrooge va decatase de que la verdadera riqueza nun s'alcuentra nel ésitu nos negocios sinón nel corazón de los homes.

Estos textos del sieglu XVII, verdaderes ayalgues que tanta curiosidá provocaron nos eruditos asturianos y españoles de magar se produció'l periodu ilustráu, permanecieran fuera del so natural espaciu, los escenarios d'Asturies, hasta que se dramatizó con gran éxitu de públicu y crítica esta «versión» en marcha d'ún de los nuestros mayores clásicos.

Nun bufete d'abogaos de Wall Street, la rapidez y limpieza del trabayu, sobremanera no que cinca a documentos llegales, resulta indispensable. El protagonista d'esta novela, un respetable home de lleis con despachu propiu y tres empleaos al so serviciu, habrá confirmalo cuando contrate al xoven Bartleby como amanuense y tope cola so resistencia pasiva, resumiendo nuna frase ablucante: "Quiero más nun facelo". Metáfora de la condición humana y del propio oficiu lliterariu, «Bartleby l'escribiente» ye la obra cume de Herman Melville (1819- 1891), al que'l gran públicu conoz más por esa otra estraordinaria novela d'homes y demonios titulada «Moby Dick». En «Bartleby», nostante, el talentu del escritor neoyorquín relluma d'una manera especial, amosando la mirada compasiva d'un narrador que conoció como naide l'alma humana. Tienra, irónica, tristísima, la historia del probe escribiente ye un poco la de toos nós, enfretaos a la xera de vivir y prisioneros cadún de la nuesa propia soledá, del nuesu abandonu nun mundu hostil que nun entendemos.

D'una cronoloxía siempre s'echen más datos a faltar de los que quedaron plasmaos nella. Esti ye'l más grande méritu d'un trabayu d'estes característiques. Saber, per un llau, que siempre va ser meyorable. Abrir, per otru, caminos nos que ponese a trabayar. Ismael María González Arias (Uviéu, 1958) vien collaborando dende hai años nos medios de comunicación con artículos relacionaos cola música asturiana. El primeru d'ellos, del añu 1984, nel diariu «La Nueva España», trataba sobre la danza prima de Mieres. Anguaño, amás de continuar les sos colaboraciones nesi diariu, firma una sección propia, «De la voz de la tierra», nel selmanariu «Les Noticies». Nel añu 1998 ganó'l Premiu d'Ensayu "Máximo Fuertes Acevedo" col llibru «L'Asturianada» (en collaboración col so hermanu Xaime), nel que sal la primer entrega d'esta «Cronoloxía». Nel añu 2000 publícase la primer edición de «Les 40 principales: cancioneru popular de Mieres», que va vese siguida d'otra nel 2001. Nos últimos años vien produciendo musicalmente trabayos discográficos como «La tonada de la mina«, «Cantares de mina», «Ea, ea, ea (Añaes tradicionales asturianes)», entre otros. Amás d'esto, ye autor d'un manual pioneru pa la enseñanza del asturianu, «Fálame, fála-y«; del diariu de rodaxe de «Pídele cuentas al Rey», de José Antonio Quirós; de noveles como «El cuartu negociu» (Premiu Xosefa Xovellanos) o «La boda del añu» y d'un exitosu «Diccionariu de la llingua (y otros órganos sexuales)».

Lo que más-y presta a Marta ye dir a ver al güelu, que-y cuenta histories de cuando salía a la mar, especialmente la vez que vio al Peludín de Carrandi.

Ernestina ye una neña revolvina y imaxinativa que sabe ver la maxa de les coses más simples. Tien un amigu d'otru país, Abdul, y al traviés de les sos circunstancies, la neña va deprender una triste lleción: el desenraigu.

La historia tien llugar na aldea de los Astures, un grupu de cabañes defendíes por unes muries nun altu que dominaba la viesca. Una mañana, mentes toos duermen, los sos enemigos, los romanos, llogren entrar en pueblu y robar el so texu sagráu. Gavitus, el fíu el xefe, sal montáu nel so asturcón a la gueta'l texu. Nun va tardar n'atopar güelgues nel barru...

En monte pasen coses mui guapes. Esto ye lo que vas descubrir nun mundu onde los animales falen y danse cuenta de que la meyor manera de vivir ye mirando, cada instante que pasa, como si fuera la primera mañana del mundu. Esto ye lo que fain los autores d'esti relatín col qu'inauguramos una nueva colección ilustrada por neños. El narrador Primitivo García y Manuel Martínez, de seis añinos, consiguen el milagru.

«A tolos mios amigos gústa-yos viaxar. Cuando llega la fin de selmana o les vacaciones, siempre se ponen mui contentos porque saben que son los momentosnos que los padres van tar en casa faciendo pequeñes o grandes maletes; y poco depués garrarán el coche y pondránse camín de dalgún llau. A mi tamién me gusten los viaxes, pero non de la mesma manera qu'a la mayoría de xente que conozo. D'otra distinta.»

Les poblaciones riques nun lo son porque seyan más llistes o porque dalgún dios lo quixo asina. Tampoco nun hai cultures que seyan meyores qu'otres, anque los grupos más poderosos suelen identificar la cultura con acumulación d'oxetos o desarrollu tecnolóxicu, ensin considerar otros aspectos, como'l conocimientu de la naturaleza o les formes d'organización social. Les desigualdae económiques nel mundu son el resultáu d'unes polítiques y unes rellaciones comerciales nes que la productividá y el beneficiu tán penriba de too. Vivimos nun sistema que, col envís de producir riqueza, nun fai otro qu'aumentar la probitú y afondar nes desigualdaes.