El paisaxe que presenta esta escritora moza aseméyase a esos cuentos onde'l protagonista dexa'l mundu real pa internase, nun se sabe cómo, nel reinu de los seres fantásticos, onde'l tiempu y l'espaciu siguen otres lleis. Nes páxines de «Nome» unes veces ye la naturaleza, cola so medría sobre los restos de la civilización, la que fai separtar l'ámbitu de lo cotidiano y conocío d'esi otru mundu incógnitu y, por eso mesmo, amenazador y atrayente. N'otres ocasiones, ye'l pasu del tiempu y les cultures lo que pon el puntu d'estrañamientu y, a la vez, el filu qu'afilvana planos aparentemente inconexos a lo llargo de la historia. Tamién los suaños, esi camín que tolos díes percuerre l'alma humana hacia les fondures de sí mesmu, revelen nestos rellatos el so poder pa dexar atrás una realidá que non por ser conocida ye más amable.

Nestos «Cuentos completos» d`Eva González (1918-2007) alcuéntranse una parte importante de la obra lliteraria d`esta escritora, hasta agora conocida fundamentalmente como autora de testos poéticos. Cuasi toulos cuentos d`esta edición son inéditos dafeitu, anque dalgunos yá s`espublizaran nos volúmenes de la serie «Na nuesa tsingua» ya tamién en distintos periódicos ya publicaciones. En narraciones de diferente calter ya tipoloxía (porque van del humor al lirismu, de lo popular a lo íntimo) dibuxa Eva González situaciones, arquetipos ya imáxenes de gran plasticidá. Al final queda'l sabor del viaxe pol territoriu sentimental de la nuesa cultura ya de la nuesa xente.

Nun hai demasiaes obres qu'aborden la esperiencia empresarial dende dientro, en primer persona. Y, de dalguna manera, entiéndese bien: nun ye una xera fácil. Ser xefe nun ta bien visto. Tener responsabilidaes, asumir riesgos y enquivocase nun tien bona prensa. Acertar, tovía menos. Y trunfar... trunfar, enforma peor. Por eso ye interesante esta versión de les coses dende'l puntu de vista d'un empresariu. Porque nun ye cosa que se faiga tolos díes. Y porque, amás, con esti llibru, Iglesias enseña cómo se puen abordar, d'una manera fresca y cenciella, temes que son realmente enrevesaos.

La borrina del Atlánticu llambe les paredes y les páxines de «La casa gris». Asuntos como'l cuadonguismu, la estroza del paisaxe tradicional, la identidá, la memoria… trescalen los artículos periodísticos axuntaos nesti volume. La poesía, la precisión y la pasión nel análisis en cada tema tratáu –la fiesta, la soledá, el chigre, la música, la dictadura, l'arquitectura rural, el progresu, la frontera…– faen de la llectura de cada artículu un exerciciu intensu abiertu al debate y a la reflexón. Y, siempre, la raíz n'Asturies, nel paisaxe de la infancia, con una mirada del autor un aquel señaldosa, lo qu'él llama «sentimentalidá celta», quiciabes «señaldá por un norte qu'enxamás ye'l norte propiu».

A primeiros da década dos anos trenta del siglo XX, a Biblioteca Popular Circulante de Castripol vivíu úa esperiencia teatral basada nos titeres, nas farsas, nos entremeses y na tradición folclórica. Nesas actividades, el uso da lingua propia da terra, el galego-asturiano, tuvo úa importancia fundamental. Este libro vén a destacar la vinculación estética y ideolóxica del labor d'esta institución del occidente asturiano con outras iniciativas aparecidas que se deron en España naquelos anos da Rapública, al tempo que recupera us testos inéditos que supóin úa sorpresa prá historia del teatro en Asturias.

Atopámonos delantre del primer estudiu monográficu que se publica n'Asturies sobre ún de los aspectos menos analizaos y debatíos de la gaita asturiana. La ornamentación ye un recursu interpretativu de carácter personal y identitariu y, sicasí, paez quedar siempre arrequexada nun deprendiientu basáu na imitación. Nesti llibru l'autor supo combinar con quilibriu conceptos, definiciones, vivencies y deprendimientu, tratando un elementu sobre manera artísticu de forma científica y secuenciada. Esti llibru va valir de guía y ayuda tanto a alumnos como a profesores, a iniciaos como a esperimentaos.

«¿Quien tien mieu a Virginia Woolf?» ye un viaxe llargu hacia’l final de la nueche. Representa, como mui poques obres, los conflictos d’una pareya n’estáu de crisis permanente, ente otres causes, pola ausencia del fiyu y l’inevitable desgaste emocional que’l pasu del tiempu trai con él. De la que s’estrenó, fixo conmocionase a la sociedá americana, que nun quería que la despertaren del so suañu, tan duce como hipócrita. Ye, ensin dulda, una pieza selvaxe, desgarrada, brutal, enllena de tensión, crueldá y abondes dosis de cinismu y alcohol. Confirmó a Edward Albee como ún de los grandes, na meyor tradición de los dramaturgos americanos.

Esti manual ta pensáu p'alumnos d'ente ocho y nueve años qu'empiecen cola gaita. Quier ser una ferramienta qu'ayude al alumnu a garrar les destreces que faen falta pa la interpretación musical nun procesu entreteníu, eficaz y integral que nun queda namás nos conteníos técnicos sinón que tresciende tanto a los teóricos como a los actitudinales.

«Stendhal dicía que la independencia nun se merez hasta que se sabe conquistar. Y eso ye lo que tenemos que facer los asturianos: reconquistar la nuestra independencia, ser adultos, madurecer. Reconquistar la independencia política y nun apurar a más caciques provincianos. Y reconquistar la independencia de criteriu pa nun siguir pensando al dictáu que manden otros. Esa reconquista nun tien nada que ver col separatismu, nin cola violencia, nin col fanatismu, nin con otres histories rares. La independencia ye un valor positivu, deseable, civilizáu. Por eso tol mundu queremos que los nuestros fíos seyan independientes, que ganen honradamente la vida, que nun dependan de naide. En definitiva, qu'aporten coses positives a la comunidá. Y non que vivan a costa d'ella.»

¿Qué derechu tien un home a ser el depositariu de la memoria d'otru al que malapenes trató? ¿Cómo acercase a la complexidá d'una vida marcada pola Guerra Civil ensin caer na mitificación o la condena? Nun cruce de caminos nel que s'alcuentren la realidá histórica, la ficción y l'autobiografía, l'autor de Paniceiros somórguiase otra vuelta –guardando siempre una distancia pudorosa que funciona como amplificador d'una emoción poco exhibicionista– na memoria familiar, na memoria d'un país qu'hai tiempu cansó de selo... na memoria del mundu. Un llibru imprescindible del autor más conocíu y reconocíu de la narrativa actual.