La borrina del Atlánticu llambe les paredes y les páxines de «La casa gris». Asuntos como'l cuadonguismu, la estroza del paisaxe tradicional, la identidá, la memoria… trescalen los artículos periodísticos axuntaos nesti volume. La poesía, la precisión y la pasión nel análisis en cada tema tratáu –la fiesta, la soledá, el chigre, la música, la dictadura, l'arquitectura rural, el progresu, la frontera…– faen de la llectura de cada artículu un exerciciu intensu abiertu al debate y a la reflexón. Y, siempre, la raíz n'Asturies, nel paisaxe de la infancia, con una mirada del autor un aquel señaldosa, lo qu'él llama «sentimentalidá celta», quiciabes «señaldá por un norte qu'enxamás ye'l norte propiu».

Esti llibru representa'l primer averamientu académicu a la historia de la televisión n'Asturies dende la llegada de la señal de TVE a mediaos del sieglu XX hasta'l nacimientu del serviciu audiovisual autonómicu nel XXI. L'autor, que contestualiza l'análisis esplicando lo qu'asocedía en cada momentu históricu nel ámbitu español y européu, repara con detalle nos años ochenta, noventa y 2000.Cristóbal Ruitiña (Cangas del Narcea, 1977), doctor en comunicación pola Universidá d'Uviéu y llicenciáu en Periodismu pola UAB ye profesor de la Facultá de Ciencies de la Comunicación de la Universidá Camilo José Cela de Madrid y redactor por oposición de RTPA.

La novela «La confesión de Lúcio» ta considerada por dellos críticos como la obra mestra del escritor Mário de Sá-Carneiro (Lisboa, 1890-París, 1916). L'enfotu del narrador, Lúcio Vaz, ye demostrar qu'él nun mató al escritor Ricardo de Loureiro, y, pa consiguilo, afirma que va dicir namás que «la verdá» hasta cuando ella sía «inverosímil».Mário de Sá-Carneiro foi ún de los mayores esponentes del modernismu lliterariu portugués y miembru, xunto con Fernando Pessoa o José Almada Negreiros, del grupu fundador de la revista «Orpheu». Sicasí, la so angustia vital, la insatisfación crónica pa cola so propia existencia y la dificultá pa facese entender poles persones que lu arrodiaben –tres rasgos que comparte colos protagonistes d'esti llibru– llevaron a Mário de Sá-Carneiro al suicidiu nel Hotel de Nice de Montmartre cuando tenía namás que venticinco años.

¿Cómo ye posible que depués d'un sieglu de Llingüística científica tovía hai un refileru de conocencies elementales del llinguaxe y les llingües que nun s'asentaron na cultura xeneral de la xente y élites cultivaes? ¿Cómo ye posible que tantos prexuicios, falses creyencies y supersticiones llingüístiques sigan tovía tan estendíes na nuestra sociedá, mesmamente cola complacencia d'una bona parte de llingüistes profesionales, que descuiden asina la so ética intelectual? Estes son delles de les cuestiones presentes nos 52 escritos que componen esti llibru, a manera de glayíu reivindicativu del conocimientu científicu nel terrén del llinguaxe y de les llingües.Ramón d'Andrés (Madrid, 1959), profesor titular de Llingua Española y Llingua Asturiana na Universidá d'Uviéu, ye autor d'abondes obres d'investigación y divulgación alredor del asturianu y la diversidá llingüística.

«Londres nevao» ye un llibru formáu por seis rellatos que tienen en común l’ambientación nel iviernu, la confusión ente narrador y autor y la descripción sicolóxica de los personaxes al traviés de los detalles pequeños. La traducción de Ramón d’Andrés dexa tresllucir mui bien la riqueza léxica abondosa y l’estilu pulíu del orixinal catalán. Periodismu, narrativa, poesía y crítica lliteraría son los xéneros nos que trabaya Jordi Llavina, ún de los referentes de la lliteratura actual en catalán. L’autor barcelonés diose a conocer nel 2001 al ganar, cola novela Nitrato de Chile, el premiu Josep Pla, ún de los de más sonadía de les lletres catalanes.

El paisaxe que presenta esta escritora moza aseméyase a esos cuentos onde'l protagonista dexa'l mundu real pa internase, nun se sabe cómo, nel reinu de los seres fantásticos, onde'l tiempu y l'espaciu siguen otres lleis. Nes páxines de «Nome» unes veces ye la naturaleza, cola so medría sobre los restos de la civilización, la que fai separtar l'ámbitu de lo cotidiano y conocío d'esi otru mundu incógnitu y, por eso mesmo, amenazador y atrayente. N'otres ocasiones, ye'l pasu del tiempu y les cultures lo que pon el puntu d'estrañamientu y, a la vez, el filu qu'afilvana planos aparentemente inconexos a lo llargo de la historia. Tamién los suaños, esi camín que tolos díes percuerre l'alma humana hacia les fondures de sí mesmu, revelen nestos rellatos el so poder pa dexar atrás una realidá que non por ser conocida ye más amable.

Sorprender un instante, y dexalu quietu na inquieta harmonía, son característiques comunes a dos disciplines mui diferentes: la fotografía y la prosa poética. En «L’alma robada», Pablo Texón amuesa toles sos habilidaes al acudir dacuando al rellumu poéticu intelixente, dacuando a la ocurrencia refexiva. Son testos qu’aspiren a descubrir la verdá interior de les coses. Al partir de les fotografíes magnífiques de Mario Rojas y Pablo Lorenzana, Texón fai que veamos más adientru. Existe una lluz intuitiva que rescampla na so prosa, una lluz que proyeuta una solombra: la intelixencia.

Atopámonos delantre del primer estudiu monográficu que se publica n'Asturies sobre ún de los aspectos menos analizaos y debatíos de la gaita asturiana. La ornamentación ye un recursu interpretativu de carácter personal y identitariu y, sicasí, paez quedar siempre arrequexada nun deprendiientu basáu na imitación. Nesti llibru l'autor supo combinar con quilibriu conceptos, definiciones, vivencies y deprendimientu, tratando un elementu sobre manera artísticu de forma científica y secuenciada. Esti llibru va valir de guía y ayuda tanto a alumnos como a profesores, a iniciaos como a esperimentaos.

Tercer entrega de les aventures de Tela, Tila y Tula. Nesta tercer entrega los llectores van descubrir por qué del sombreru de Tila nun sal nada, amás de conocer la historia d’Urbano, un ratu mui especial que tien una fame salvaxe y que, al final, resulta nun ser un ratu.

Una de les meyores coses del branu ye tener vagar pa dedicase a los placeres y escaecer les obligaciones, el trabayu intensu, la rutina, el fríu y la escuridá del inviernu. De les munches coses que se puen facer nel mes d'agostu, una bien prestosa ye dedicase a la llectura.«Cuentos pal mes d'agostu» son doce narraciones imprescindibles formaes por dalgunos de los nomes más importantes de la nuestra lliteratura (Berta Piñán, Miguel Rojo, Esther Prieto, Antón García, Paula Pulgar Alves...). Doce cuentos intensos y redondos como'l sol braniegu.