Relatos medievales asturianos del sieglu XII

Asturies vive dándo-y el llombu al so espléndidu pasáu medieval. Prueba d'ello puen ser los siete relatos medievales que se recueyen nesti llibru, orixinalmente concebíos y difundíos en llatín y poco conocíos del públicu. Son testos clericales, pensaos pa xente erudito y enmarcaos na mentalidá medieval, fundamentalmente del sieglu XII, anque d'ún d'ellos hai una primer versión de 1075, y otru llega a nós tresmitíu nuna copia del sieglu XIII. Pero nun se pue descartar qu’estos testos tuvieran na so dómina un aquel de popularidá; en tou casu, como diz Xulio Viejo, taben cargaos d’una fonda ideoloxía llexitimista y imperial: el Reinu asturianu como sucesor del visigodu y, poro, con tol derechu a recuperar les sos vieyes tierres.El llector modernu va topar más d'una satisfacción na llectura d'estos relatos, “singular amiestu d’evidencies incontestables y fabulaciones fantástiques”, según el recopilador.Esti volume de relatos pue entendese dientru d’un trabayu más xeneral del proyectu Historia de la lliteratura asturiana, lleváu a cabu dende la Facultá de Filoloxía de la Universidá d’Uviéu y naz col enfotu de dar a conocer al llector asturianu los testos de la lliteratura medieval astur-lleonesa.Xulio Viejo (Uviéu, 1968), profesor, narrador y poeta, tien publicaes los llibros« Na llende del condicional perfeutu» (novela, 1990),« Les falcatrúes del demoniu» (cuentos, 1992), «Les etimoloxíes del silenciau» (poesía, 1997) y «Los araxales de la vida» (novela, 2001).