Xurde Álvarez Fernández naz en Sama Llangréu en 1973. Poeta y narrador, ye Llicenciáu n'Alministración y Dirección d'Empreses pela Universidá d'Uviéu. «La sema», que l'autor define como «llibru-suañu», ye la primer obra que publica, anque tien un cuentu recoyíu nel colectivu «Cortos, cortos» (Artnalón Letras, 1996) que se titula «De madre a hija».

Escritu a manera de diariu, «La caída» ye un percorríu pela desesperanza y la soledá, pel silenciu doliosu de la nada; un poemariu descarnáu y duru como pocos. Pero hai esperanza, del vacíu que sigue a la caída puede surdir la vida y ye posible llenala porque «Too t’aguarda, / añera, / espera en ti y guaria / pa comenzar / de nuevo y contigo mesmu / la vida...». «La caída» ye’l poemariu más personal ya intimista de Xurde Álvarez (Sama de Llangréu, 1973), narrador y poeta, que cunta yá con otros dos poemarios publicaos nesta mesma editorial, «La sema» (1999) y «Tierra d’esperanza» (2008).

N’ochobre de 1939, Adolf Hitler robla la Gnadentod, na qu’autoriza a dellos médicos a dar muerte de gracia a persones con enfermedaes incurables. Esta carta permitió-y al réxime nazi esfacese nos campos de concentración y d’esterminiu de persones «non productives».«Si’l temblor niega’l fríu» narra la vida de dos muyeres nun psiquiátricu alemán de la dómina: l’ideal y el contraideal mécense y intercámbiense nesta obra densa, teatral, na que l’autor reflexa l’atmósfera irrespirable y opresiva d’una sociedá amedranada, cegarata y mezquina que convive cola crueldá y l´horror, «tantu horror qu’a cada párrafu va arrancándote dalgo per dientro hasta dexate ensin nada».Xurde Álvarez (Sama Llangréu, 1973) ye poeta, narrador y autor de testos teatrales. Tien editaos los poemarios «La sema» (1999), «Tierra d’esperanza» y «La caída», entrambos los dos del 2008; la novela «No fondero de l’alcordanza de Dios» (2004) y la obra dramática «Les llames del to llar antiguu» (2005).

Diez años van dende que s’escribió «La sema». Diez dende que se mandó’l manuscritu orixinal a esta editorial con una curtia nota que dicía: «Esti ye’l sueñu d’un home pa los homes del so pueblu. Espero que lu asoleyen», y diez dende que tenía veintitrés y munches esperances de poder cambiar dalgo nesta tierra rota del desahuciu. Agora pienso que diez años son munchos pa siguir diciendo «Patria mía; fría baxa la nueche / sobre los tos costazos», «Falo de desatar silencios / de segar desaliendos». «Mientres haya despreciu polo nueso / taremos encadenaos a la sollume…». Pienso que diez años son munchos –quiciabes demasiaos– pa continuar diciendo: «Porque te tán matando, voz viva / llingua mía / porque te tán matando», «Campos naguantes / d’espigues de lluz», «Patria mía / erma de fe / erma de suaños…». Agora, agora tamién pienso qu’ensin embargu diez años nunca nun son munchos pa siguir diciendo: «Tierra a contramuerte», «Vengo a delliniar contigo / el redol del nuevu día», «Llevántate. / Espierta. Tienes que prender el sol», o «¿Quién encuma un sueñu?» o «Fe na vida y nel home».Diez años, pa dicir esto, nunca nun son munchos; nunca suficientes, bastantes, escasos…Anguaño, «a la lluz d’un sol de candiles», teo fe nuna tierra enllena d’esperanza. Sigo dedicándola a los que llevanten Asturies, a los que creyen nella, «a los que la quieren, a los que la sienten»… «onde quiera que tean», y sigo esperando qu’estos versos «inviten a pensar / como’l primer pasu / pa construyir el camín».

«Moby Dick, la sangrina llucha na metada l’océanu ente’l gran mostruu blancu y el capitán arrechu y seriu, como metáfora de les lluches obreres de l’Asturies de los años 30 del sieglu pasáu: esto ye «No fondero de l’alcordanza de Dios». Esta novela, la primera de Xurde Álvarez, cuenta la llucha pola supervivencia d’una familia demientres la güelga de la metalurxa que duró dende payares de 1932 a agostu de 1933 y que constituyó –ente la miseria y la ruina– una de les güelgues más llargues de tolos tiempos, y de la que l’hispanista británicu Gerald Brenan dixo que yera «la más travesada y heroica güelga nes añaes de la clas trabayadora española». Narrada en tola crudeza coles palabres d’un nenu que la vive y la xufre, que tenta d’entendela y que, cola proverbial sabiduría que dan el dolor y la fame, albidra qu’esta griesca ente capital y obreros ha terminar cola destrucción y la muerte, neto que na novela xuvenil que lu guía y salva de los díes escuros y terribles. Xurde Álvarez Fernández naz en Sama de Llangréu en 1973. Poeta, narrador y autor teatral, tien publicáu’l poemariu «La sema» (Ediciones Trabe, 1999) y ta acabante ganar el concursu de Teatru que convoca añalmente l’Academia de la Llingua Asturiana na edición del añu 2004 cola obra «Les llames del to llar antiguu».