Somos homo belicous. Namás que la nuestra especie y les formigues son capaces de facer la guerra. Hai munches especies nes que de cuando en vez hai griesca. Mesmamente, delles viven de matar o otres. Pero la guerra nun ye griesca cenciella. La guerra ye una griesca de munchos contra munchos, y por eso pa facela cada bandu tien que tener la so cohesión, la so organización, la so xerarquía, les sos armes. La guerra nun ye un cabréu momentaniu, hai que la preparar con procuru muncho primero de qu'empiece. Enantes de que s'engafenten los militares, ta'l trabayu de munchos civiles faciendo les armes y los motivos.

Daben tochazos y pataes a los echaos y a les mochiles, como si anduvieran a la gueta de daqué. Munches llevantábenles pa que cayera en suelu tolo qu'hubiera dientro. A mi garróme ún peles guedeyes pa que me punxera de pie y tovía me dio un tochazu en culu según corría pa una paré. Vi un mozu cola cara ensangrentada. Vi xente glayar asesinos y fascistes en delles llingües. Después de tratar a pataes les nuestres coses y dexalo too como tres d'una riada, depués de firir a bastante xente, depués de que marcharan con una docena o más, cuasi toos italianos... vi llorar de rabia a muyeres y homes, vi gritar d'indignación, y lo que más me conmovió foi ver al guitarrista, que debía ser inglés, cola guitarra frañida. cantando "Nun nos moverán. ¿Qué ye la globalización? ¿Por qué la globalización de la xente ta en contra de la del dinero?