Nel so segundu llibru de poemes, Xosé Anxelu Gutiérrez Morán ofreznos la so versión d’una Historia Natural, onde los trenta animales y plantes qu’aparecen nun son siempre lo qu’aparenten ser. «Diversa memoria», qu’algamó’l XVIII Premiu «Teodoro Cuesta» en 2008, ye tamién un catálogu, variáu al empar nes formes poétiques, de les múltiples formes que garra la memoria pa dexase ver primero de volver sumise. L’autor equí axunta dos mundos, l’interior, les vivencies que tenta otra vuelta d’ordenar, y l’esterior, representáu por una amuesa pequeña de la rica biodiversidá atlántica.Xosé Anxelu G. Morán (Avilés, 1969) ye doctor en bioloxía y investigador nel Centru Oceanográficu de Xixón (IEO). Autor de cerca de cuarenta artículos científicos en revistes especializaes, como escritor n’asturianu tien publicáu’l poemariu «Países» (XIV Premiu «Teodoro Cuesta», Trabe, 2005) y dellos poemes en revistes lliteraries, amás del cuentu «Anestesia», premiáu nel V Concursu de Cuentos pola Oficialidá (Camín de Bimenes, Xébana Ediciones, 2008). Collaboró tamién con un capítulu sobre ecoloxía de los microorganismos marinos nel llibru «La ciencia n’otres palabres» (Xulio Viejo, coord., Trabe, 2007).

Con esti llibru, que recueye poemes escritos de manera discontinua na última década, Xosé Anxelu Gutiérrez Morán ganó ex aequo'l Premiu "Teodoro Cuesta" 2004. Con procuru por que les palabres tean cómodes nel versu, fálasenos nél del amor y la pérdiga, cuasi siempre amable, qu’ésti trai davezu de la mano. Los diferentes poemes, marcaos por una señaldá posada, conformen un atles de los países que, dacuando con permisu de residencia y dacuando ensin papeles, foron faciendo la biografía del autor.Xosé Anxelu G. Morán (Avilés, 1969) ye doctor en Bioloxía pola Universidá d'Uviéu y trabaya como investigador nel Centru Oceanográficu de Xixón. Autor d'una ventena d'artículos científicos, ésta ye la so primer incursión na lliteratura nun siendo un relatu premiáu nel Concursu de Cuentos pola Oficialidá de Bimenes en 2002. Países ye un intentu arraimente empíricu d'aplicar el métodu poéticu pa ordenar el mundu.