Conceyu Bable n´Asturias Semanal (1974-1977)

Los trenta años de Conceyu Bable son una bona sida pa entamar a repasar la historia reciente del asturianismu. Pa ello, Ediciones Trabe quier apurrir los primeros papeles d’aquella asociación histórica, los que se publicaron na revista «Asturias Semanal» ente’l númberu 285, de 23 de payares de 1974 y el 413, del 11 al 18 de xunu de 1977. Cuidamos que puen sirvir como material d’estudiu o como simple entretenimientu pa quien quiera averase a un intensu, apasionáu y apasionante periodu de la nuesa historia más reciente. La presencia ente nós de la mayor parte de los sos protagonistes, y la sensación de que’l llabor entamáu nun se terminó, permite sentir aquella época como tovía cercana y nun la percibir como un tiempu históricu a la manera tradicional; quiciabes por eso seya más difícil consultar les publicaciones o la documentación d’hai tres décades que, por exemplu, la d’a primeros del sieglu XX. A resalvar esti problema pretende contribuir la publicación d’esti tomu, el primeru d’una serie na que queremos recoyer aspectos esenciales del nuesu inmediatu pasáu, que va tener continuidá cola publicación d’un segundu llibru onde se recueyen, tamién en reproducción facsimilar, les «Fueyes Informatives de Conceyu Bable».