Lehen ipuinekin batera, galdera berbera askoren ahotan, gerora sarritan errepikatua: Eta? Noizko liburua?, liburua kaleratu ezean idatziak ezer gutxirako balioko balu bezala... Ordutik, presarik gabe, hor pilatu dira istorioak denbora luzean, kartoizko karpeta batean, elkarren gainean. Halako batean, argitaratzea erabaki eta orain artekoak irakurtzen hasitakoan, sorpresak ere izan dira tartean, batzuetan nekeza baita zeure burua hor ezagutzea; gertatzen da, adibidez, istorioaren hariak nora eramango zaituen ez akordatzea, edo seko ahaztea garai hartan hain presente ziren obsesioak, ipuin-itxura hartuta: bultzatzen gaituen bizi-poza, higatuz doazen bikote-harremanak, denboraren joan nekagaitza, iraganarekiko kate-lotura... Guztiak ere -guretzat, behintzat- egunerokoak ez diren istorioak...

Gaur egun berezia da, saria jaso behar dugulako, eta zer gertatzen den gelan kontatu beharko dut astelehenean, andereño Mertxek asteburuan zer egin dugun galdetutakoan. Bide batez, Julen Alkortak ere entzun dezala, gure aita idazlea dela jakiteko. Orain, kultur etxera iritsi berriak, hemen gaude zain, areto nagusian, zutik, ekitaldia noiz hasiko, laurok. Aitak eskutik heldu dio amari eta musu eman dio. Izar eta ni bien artean jarri gara, atzetik, hanketatik helduta. Amak begiratu eta irribarre egin dit. Aitak eskua buru gainetik pasatu eta kalparra harrotu egin dit. Kanpeon esan dit belarrira.

Igande goiza da. Garajera jaitsi da Xabi, autoa hartzera, ondoko herrian lasterketa batean irten behar du eta. Isiltasunean, "miau" entzun du, autoaren motor aldetik. Isilunea, eta berriro “miau". Ez dauka dudarik: katuek egiten dute miau. Laster ezagutuko du Bixitxo, bolada batean bizimodua aztoratuko dion katakume bizi-bizia.

Nolakoa da zure herria, handia edo txikia? Zerekin alderatzen dugun, ezta? Gorkari Paris txikia iruditu zaio, hiri horretan egon berri baita familiarekin, egun batzuk pasatzen. Parisen bada, ordea, gauza bat handia, lehen begiratuan ia ikusten ez dena: metroa. Gorkak aukera izan du Paris txikiko metro handia ezagutzeko, eta han abentura polita ere gertatu zaio.