www.paquebote.com > IGNACIU LLOPE
La borrina del Atlánticu llambe les paredes y les páxines de «La casa gris». Asuntos como'l cuadonguismu, la estroza del paisaxe tradicional, la identidá, la memoria… trescalen los artículos periodísticos axuntaos nesti volume. La poesía, la precisión y la pasión nel análisis en cada tema tratáu –la fiesta, la soledá, el chigre, la música, la dictadura, l'arquitectura rural, el progresu, la frontera…– faen de la llectura de cada artículu un exerciciu intensu abiertu al debate y a la reflexón. Y, siempre, la raíz n'Asturies, nel paisaxe de la infancia, con una mirada del autor un aquel señaldosa, lo qu'él llama «sentimentalidá celta», quiciabes «señaldá por un norte qu'enxamás ye'l norte propiu».
Poesía del amor, poesía de la llucha, esta obra amuesa un naturalismu simbólicu onde'l paisaxe ye unes veces protagonista inmediatu y otres namás escenariu, telón de fondu de la vida, ensin que por ello tea ausente, cásique siempre dende la memoria, el ser humanu. La lluminosidá, el rigor poéticu, la cenciellez, el llinguaxe trabayadamente cotidianu son dalgunes de les claves que nos permiten interpretar la poesía de Xuan Ignaciu Llope (Cuideiru, 1962), médicu de profesión na tradición llarga del humanismu, que publicaba en 1992 esti primer y de momentu únicu llibru de poemes. En 1989 asoleyó De les coses del mundu, recopilación d'artículos y ensayos sobre diversos temes d'actualidá.
Con esti llibru qu’algamó’l Premiu «Fernán-Coronas» de poesía na so sesta edición, Ignaciu Llope publica un nuevu conxuntu de poemes siete años depués de qu’apaeciera «Xeografía del augua», la so única entrega hasta’l presente. Hai, dende llueu, continuidá ente aquel primer llibru y ésti: el llugar de l’agua, la so xeografía, dexen pasu agora al llugar del sol; tamién equí la lluz ye vida, mientres la nueche, qu’asoma poques veces, connota acabación y muerte. La d’Ignaciu Llope ye una poesía que se construye como una semeya, cásique como una breve secuencia animada: detiénse nella un momentu del día y, con palabres cencielles y precises, va dándonos cuenta d’una mirada, del amor, de la infancia, de la soledá, del abandonu, de la esperanza... de la vida en definitiva. Ye una poesía esencial que se (re)ellabora a través de l’alcordanza, pero na que nun s’atopa rastru de señaldá: más bien ta fecha d’imáxenes cotidianes, de sensaciones conteníes, onde’l paisaxe y el ser humanu siguen siendo, xunto col propiu llinguaxe, los protagonistes de la so esperiencia poética. Ignaciu Llope nació en Cuideiru en 1962. Ye Llicenciáu en Medicina y Doctorando n1Antropoloxía Biolóxica pola Universidá d’Uviéu. Ye miembru del Conceyu d’Estudios Etnográficos Belenos y del conseyu editorial de la revista «Asturies, memoria encesa d'un país», amás de pertenecer al conseyu de redacción de la revista«Lliteratura», qu’edita l’Academia de la Llingua Asturiana. Tien dos llibros publicaos: «De les coses del mundu» (ensayu, 1989) y «Xeografía del augua» (poesía, Trabe, 1992). Acaba de publicar una escelente traducción de los cuentos d'Ánxel Fole «A la lluz del candil».
20,8x14,5. 52 pp.+1 h. Rústica. Ámbitu ediciones. Uviéu, 1989.