El diablu en cuerpu

A la sociedá francesa, que veneraba a los ex-combatientes de la Primer Gran Guerra como héroes, nun-y diba pasar desapercibida una obra que contaba l'amor adúlteru ente una muyer casada y un adolescente mientres l'home d'ella taba lluchando nel frente. Foi un escándalu. Pero l'argumentu nun dexa de ser una pura anécdota. Lo que fai d'esta novela una obra maestra, que yá se llevó al cine nun par d'ocasiones, ye l'acabáu retratu psicolóxicu d'esi amor imposible que fai'l narrador echando una mirada cínica a la vida. Raymond Radiguet nació en St-Maur-des-Possés en 1903 y morrió en París en 1923. Esta novela publicóse en 1921, y Bal du comte d'Orgel, yá póstuma, en 1924. La traducción ye de Xulio Vixil.