Palabres blanques «Testos d’Historia y Crítica lliteraria (Esbilla)»

Anque Xosé Bolado anguaño seya conocíu sobre too como poeta, lo cierto ye que’l so llabor como estudiosu y críticu foi capital pal desarrollu de la llírica en llingua asturiana, de la que marcó, en dellos momentos, la evolución; d’aende’l títulu de «faru imprescindible» col que se refier a él Xosé Ramón Iglesias Cueva. Nesti volume recuéyense algunos de los testos críticos y histórico-lliterarios más significativos d’esti autor, como’l prólogu a l’Antoloxía poética del Resurdimientu (1989), el llibru fundacional de la poesía nueva n’asturianu, o la síntesis histórica que realizó en «Lliteratura contemporánea en llingua asturiana» (1990) y en «Escritores en llingua asturiana» (1992), nel primer casu dibuxando’l camín que garró la lliteratura hasta llegar al Surdimientu y nel segundu, falando de clásicos como Teodoro Cuesta, Pachín de Melás, Pepín de Pría y Fernán-Coronas. Nel llibru puen encontrase tamién les sos idees sobre’l teatru y los análisis que dedicó a la obra de poetes yá fallecíos, como Andrés Solar o María Teresa González. Incluye cuatro testos, en tou casu, esenciales pa conocer la evolución de la poesía asturiana de les últimes décades: «Una llectura inxenua de la nuesa cabera poesía» (1991), «Poemes pa una certidume» (1996), «Tardes de llibrería, una metáfora sobre’l pasu del tiempu» (2003) y «Al ritmu de los díes de la vida propia. Una mirada circunstancial sobre poesía nueva» (2014). A estes crítiques, que definieron un canon llíricu, hai que sumar les llinies maxistrales de «En prenda, la mio casa» (2005), escrites cuando la lliteratura del Surdimientu algamaba la trentena.