Un publicitariu con munchu éxitu profesional y una guapa familia ve cómo na so vida llaboral apaecen un ayudante que gasta una eficacia increíble y una rapaza cola que vivió una aventura estramatrimonial. Estos dos elementos faen qu'esti executivu, home seguru, competitivu, equilibráu y avezáu a disfrutar siempre del trunfu se vea metíu en dellos reveses colos que nun contaba. José Ángel Gayol preséntase como narrador en llingua asturiana con esta rica y ellaborada obra que promete una trayectoria fulgurante.

«Lo que pretendo entamar nestes páxines podría definise como unos exercicios d’asturianu. Sedrán unos exercicios ensin gramática, nin filoloxía, azorianianos, pero exercicios al fin y al cabu. Van debalar asina al rodiu del mundu, nuna llingua determinada y como forma d’espresión lliteraria. O polo menos quieren ser artículos lliterarios, non de política nin actualidá, magar que’l detonante sía una noticia pública o un acontecimientu personal. [...]Fáiseme necesario esclariar que tomo exerciciu nun sentíu ampliu, siguiendo les estremaes acepciones que’l diccionariu recueye. Estes páxines sirven pa exercer, n’acción y n’efectu, una llingua que vive pol exerciciu, pol so usu regular y natural».José Ángel Gayol (Mieres del Camín, 1977), persona d’amplia formación y distintes inquietúes lliteraries, sociales y polítiques, ye escritor y críticu lliterariu. Poeta de voz propia («Los poemes del oriental», 2012; «El llibru de les coses misterioses», 2013; «Los suaños y los díes», 2014; y «Una selmana y otros díes», 2015), d’hai poco p’acá ta amosándose como ensayista amenu y arteru, y d’esa manera lo manifiesta en «Vértigu. L’atracción del abismu na sociedá contemporánea (2016) o nestos «Exercicios d’asturianu», recopilación de testos a mediu camín ente l’artículu lliterariu y d’opinión o «ensayísticu», nos que vuelve posar la so mirada aliella sobre’l devenir del mundu y de la vida.

«Una selmana y otros díes» ye un poemariu escritu, en parte, a manera de diariu: de llunes a domingu los díes pasen y l'autor inmoviliza nos poemes non los momentos vivíos sinón les atadures, les buelgues ingrientes que dexen nél.Nos sos versos, d'aparente cenciellez, viven y reviven les voces d'otros poetes, dende Álvaro de Campos a Alberto Caeiro –desembocando entrambos y dos como ún solu que son nes cais d'una Lisboa doblemente pessoana–, de Borges a David Hernández Sevillano, ensin escaecer a Benedetti, Al Berto o Berta Piñán. Ye la de so una poesía que transita otres voces y fai suyos o reescribe otros versos que-y son vitales pa trescalar y entender la vida.José Ángel Gayol (Mieres del Camín, 1977) ye llicenciáu en Derechu pola Universidá d'Uviéu y n'Antropoloxía Social y Cultural pola UNED. Como poeta tien publicaos los llibros «Con el velo de una sonrisa» (2006, en castellanu), «Los poemes del oriental» (2012), «El llibru de les coses misterioses» (2013) y «Los suaños y los díes» (2014). Críticu lliterariu amás d'escritor, nel 2007 vio la lluz la so única novela, «Argonautes», y yá unos años primero, nel 2011, estrenara la so carrera como escritor de testos teatrales con «Ensin noticies del fin del mundu«.

Construyir un país onde guardar la risa de la infancia, onde añere l’escaezu de la mocedá y de les sos derrotes. Un país nel qu’entre’l testamentu d’un home minúsculu: «Soi minúsuculu, indefensu, / namás un fueguín ente vientu arispio».«El llibru de les coses misterioses» ye un poemariu de señardaes rotes y un futuru de silenciu d’álamos y nada.José Ángel Gayol (Mieres del Camín, 1977) ye llicenciáu en Derechu pola Universidá d’Uviéu y n’Antropoloxía Social y Cultural pola UNED. Escritor y críticu lliterariu n’asturianu y castellanu, tien yá publicaes delles obres de poesía («Con el velo de una sonrisa», 2006; «Los poemes del oriental», 2012), prosa («Argonautes», 2007) y teatrales («Ensin noticies del fin del mundo», 2011).

«Los suaños y los díes», Premiu «Fernán-Coronas» del añu 2011, ye'l tercer poemariu que publica José Ángel Gayol, anque nun-y correspuenda esti puestu cronolóxicamente falando. En tou casu, como'l mesmu autor reconoz, esti poemariu más «Los poemes del oriental» (2012), «El llibru de les coses misterioses» (2013) y otru entovía inéditu formen un «cuadru (...) de les esmoliciones, sentimientos, esperiencies o reflexones qu'acarreté durante los últimos siete o ocho años».Si «El llibru de les coses misterioses» ye poesía metafísica que s'interroga sobre la vida y el llugar de cada persona nel mundu, «Los suaños y los díes» ta formáu por versos más realistes, tamién más tristayos, que se centren na esperiencia personal del poeta.José Ángel Gayol (Mieres del Camín, 1977) ye llicenciáu en Derechu pola Universidá d'Uviéu y n'Antropoloxía Social y Cultural pola UNED. Escritor y críticu lliterariu, amás de los llibros de poemes citaos más p'arriba, que lu convierten nuna de les voces más importantes de la nueva poesía asturiana, tien publicáu'l poemariu «Con el velo de una sonrisa» (2006), la novela «Argonautes» (2007) y la obra teatral «Ensin noticies del fin del mundu» (2011).

Con «Vértigu. L’atracción del abismu na sociedá contemporánea», obra d’estructura bien novedosa, l’autor indaga sobre un mundu aceleráu, nel que’l vértigu apodera con too hasta «nun dexar tiempu pa pensar, pa reflexonar con vagar». Dende’l cumal de los rascacielos de Wall Street, de Dubái o de Kuala Lumpur naide nun tien posa: homes y muyeres cuerren como formigues ensin destín.Nesta obra, l’autor tenta de desentrellizar l’andoliar del ser humanu nuna sociedá cambiante y inestable que lu fai andar siempre al debalu, col maréu del vértigu y de la velocidá. Y failo con una narración harmoniosa y un llinguaxe bien áxil y llixeru.José Ángel Gayol (Mieres del Camín, 1977) ye escritor y críticu lliterariu. Como poeta tien publicaos los llibros «Con el velo de una sonrisa» (2006, en castellanu), «Los poemes del oriental» (2012), «El llibru de les coses misterioses» (2013), «Los suaños y los díes» (2014) y «Una selmana y otros díes» (2015). Nel 2007 vio la lluz la so única novela, «Argonautes», y unos años depués, nel 2011, estrena la so carrera como escritor de testos teatrales con «Ensin noticies del fin del mundu».