Con esta obra, cola que Marta Mori ganó nel añu 2004 el premiu Teodoro Cuesta de poesía ex aequo con Ánxelu Gutiérrez, l’autora confirma la so condición de poeta intimista, observadora ya intérprete de los propios sentimientos.«El tiempu de la espera» plantega un itinerariu iniciáticu que conduz al llector dende’l dolor esistencial y la señardá de lo pasao hacia la serenidá y la confianza, tres tocar distintes emociones y situaciones vitales –l’angustia y la tristura, l’erotismu, l’apegu y el desapegu hacia l’amante, la llegada del fíu...-. Nesti percorríu, les circunstancies biográfiques constitúin el puntu de partida d’una reflexón sobre delles preocupaciones universales, como la soledá, el pasu del tiempu o la construcción de la identidá como muyer.Escritu con una voz austera ya inequívocamente femenina, el llibru cuenta la historia d’un aprendizaxe sentimental que tien como meta la conciencia y l’aceptación del dolor y de la muerte. Marta Mori d’Arriba (Xixón,1965) ye doctora en Filoloxía Hispánica y profesora. Nel añu 2003, diose a conocer como poeta col llibru «Pórticu», que publicamos nesta mesma colección col númberu 23. Tien asoleyaos dellos trabayos de crítica ya historia lliteraria y didáutica de la llingua y la lliteratura, los más d’ellos sobre temes asturianos.

Con esti poemariu, el primeru de so, ganó Susana Rodríguez Sela'l Premiu "Fernán-Coronas" na convocatoria del añu 2004 y con él vien sumase a la llarga nómina de muyeres poetes d'Asturies, con renovaos esfuerzos y aire nuevu, ensin renegar de la xeneración anterior, pero amosándo un tonu marcadamente más personal y pasional, frente al mayor distanciamientu y posu sosegáu de les xeneraciones anteriores.Susana Rodríguez Sela nació n'Uviéu'l 14 d'Avientu de 1968. Vive n'Avilés ya estudió'l primer ciclu de Ciencies Químiques. Llevantó la llibrería Seronda, na que tuvo trabayando ocho años. Tien "familia adoptiva" en Vil.lar de Naviegu ya Naviegu, ya seique por eso-y dicen que "fala central pero nun fala central ya fala oucidental pero nun fala oucidental". Présten-y les llingües, ya fala, amás del asturianu ya castellanu, gallegu, inglés ya francés, un poco menos de catalán ya esti añu va entamar col alemán. Fai tamién encuadernación artesanal ya pasa la vida peles montañes asturianes, fixendo senderismu, ya pelos pueblos, falando cola xente. Pertenez a l'Asociación Cultural "Escontra'l Raigañu", u s'encarga, dende esti añu, de los trabayos d'investigación._x000D_

Nel añu 2001 publicaba Naciu ´i Riguilón, n'edición billingüe y con númberos cuntaos la so primer obra «Queixas ya conxuros». Güei, nesta segunda entrega, abandona aquel territoriu cósmicu pa facer una guapa poesía intimista, desnuda de toa retórica, na qu'al par de las ideas resplanden la sonoridá espresiva de las palabras ya'l sou ritmu. Fiel a los inicios del grupu d'escritores del occidente asturianu allá pelos años 80, Naciu 'i Riguilón siguíu utilizando aquella grafía, la mesma qu'emplega nesti llibru.

Vanessa Gutiérrez afronta nesti llibru'l procesu de construcción de la propia identidá nel espaciu acotáu d'una dinastía de muyeres. Usando una voz narrativa dura, sincera y directa aporta a la llectora y al llector una visión (la propia) d'un tema universal, faciendo de pasu un retratu de la esencia menos evidente del matriarcáu asturianu. Creando una atmósfera cuando máxica, cuando cruel, pero siempre auténtica, Gutiérrez aborda con humildá y riqueza de matices un tema tan cotidianu como interesante: el conflictu implícitu en tou crecimientu personal. Baxo'l títulu de «La cama» escuéndese'l llibru seguramente más intensu publicáu hasta la fecha pola autora, una obra única nel panorama lliterariu asturianu escrita baxo'l dictáu d'emociones pures nacíes del conflictu xeneráu pola necesidá del conocimientu propiu, el pesu de les enseñances inculcaes poles antepasaes y l'amenaza omnipresente del futuru siempre inciertu.