Como yéramos ye un conxuntu de catorce narraciones que dan idea de cómo fuimos los asturianos nun pasáu nun tan perdíu nel tiempu. Tiempu que va dende la Campaña del Rif (primeros del sieglu XX) a lo últimu de la década de los setenta del mesmu sieglu. Trabayu, silenciu, más trabayu y una vida ensin grandes placeres pa ser quien a ufiertar a los fíos una vida meyor. Como yéramos: alcordanza d’entós, pa que nun escaezamos quién fuimos, pa saber quién somos. Ensin aspavientos, como yéramos, como somos. Rellatos tomaos los más d'ellos de la realidá vístense colos artificios de la ficción lliteraria, adoptando dalgún característiques teatrales y dalgún otru una manera intermedia de ser ente'l rellatu y l'artículu periodísticu.

Xuan Xosé Sánchez Vicente (Xixón, 1949), Premiu Nacional de Lliteratura 2020, ye una de les voces de más prestixu nel mundu lliterariu asturianu. Cofundador de Conceyu Bable y políticu activu, ye escritor qu'abarca tolos xéneros: poesía (reunida nel 2018 en Propia xera. Poesía completa [1974-2018]), teatru, novela (La muerte amiya de nueche, 1984, 2011), cuentos y relatos (Cuentos de llingua afilada, 1984; Lluna llena, 1990 y Azurriángamelamelonga [Segunda edición], 2011). Amás d'obra de ficción tien publicaos dellos diccionarios, artículos lliterarios y estudios sobre lliteratura.

XUAN XOSÉ SÁNCHEZ VICENTE nació en Xixón en 1949. Catedráticu de Llingua y Lliteratura, ye presidente del Partíu Asturianista y tien una amplia obra de creación qu’abarca tolos xéneros. Tien publicaos los siguientes llibros de poesía: «Camín de Señardaes (Antoloxía poética, 1974-1979) (1980), «Poemes de Xixón» (1981), «De reidores costes» (1988) y «...Y de llastientes picos» (1999).Como narrador publicó en 1984 «Cuentos de llingua afilada», en 1990 «Lluna llena» (cuentos) y tamién en 1984 la novela «La muerte amiya de nueche», premiu Xosefa de Xovellanos.Tamién ye autor de delles obres de teatru, de dos diccionarios d’asturianu, de varios llibros d’ensayu, investigación etnográfica, lliteraria y llingüística, y de sinfinidá d’artículos, conferencies y comunicaciones.

Estudios (I) va ser el primeru de dos volúmenes nos que l’autor quier recoyer tola so producción al rodiu la lliteratura asturiana, amplia y distinta, espardida per llibros colectivos y revistes especializaes.

Esta segunda edición, ampliada y revisada, del «Refraneru asturianu» ye la más completa recopilación de refranes d’Asturies que se pue alcontrar.El llibru ta dividíu en tres partes bien estremaes: una teórica, na que los autores espliquen con brevedá y aciertu qué entendemos por refraneru «asturianu», les distintes clases y formes sintáctiques que presenta, así como dalgunes notes característiques de la paremioloxía asturiana referida al cuerpu, la enfermedá y l’alimentación. Al tiempu, los autores faen una reflexón sobre’l camín qu’han triar los futuros estudios sobre’l refraneru asturianu, al empar qu’estudian la bibliografía yá existente.Sigue depués la segunda parte, el refraneru propiamente dichu, que recueye más de 4.000 refranes clasificaos según el tema al que faen referencia. A lo último pieslla’l llibru un mui útil índiz temáticu, por palabres qu’apaecen usaes nos refranes, que facilita la busca d’un refrán determináu.Ye esta una publicación pa saborgar, pa deprender y, al empar, pa evitar el desaniciu d’una parte importante de la cultura asturiana. El refraneru reflexa meyor que nada la forma de ser, de ver y de sentir la vida d’esti pueblu.

La yá estensa y variada obra poética de Xuan Xosé Sánchez Vicente complétase con esta nueva entrega, la cuarta, que ye, en cierta midida, una continuación del so anterior llibru, «De reidores costes». El propiu autor ponlo de manifiestu dende'l títulu, nel so paralelismu, nos puntos suspensivos y na conxunción copulativa que remiten a aquel. Como nos anteriores, la bayura métrica tamién caracteriza esta poesía, na que podemos alcontrar poemes que recreen la tradición popular xunta otros que van a la busca de nueves formes d'espresión. Ye nestos onde'l versu s'anancha y afonda esperimentando col propiu llinguaxe lliterariu, que remana como naide la más xenuina espresión popular y la culta. Asina traza nesta obra, escrita en plena madurez creadora, una rica y tamién amplia esperiencia poética que va dende'l yo intimista a la declaración colectiva (lo que'l propiu poeta definió como «testimoniu moral-cívicu»). ...y de llastientes picos presenta, sicasí, más d'una novedá. Quiciabes pague la pena resaltar, por exemplu, el tonu irónicu de varios de los poemes: una vegada más Sánchez Vicente abre un camín nuevu na poesía asturiana. Xuan Xosé Sánchez Vicente nació en Xixón en 1949. Catedráticu de Llingua y Lliteratura, profesor, presidente del Partiu Asturianista, tien una amplia obra de creación qu'abarca tolos xéneros. Tien publicaos los siguientes llibros de poesía: «Camín de Señardaes (Antoloxía poética, 1974-1979)» (1980), «Poemes de Xixón» (1981) y «De reidores costes» (1988).

Antón de Marirreguera, primer autor de nome conocíu de la lliteratura asturiana, derrompe'l camín de les nueses lletres nel sieglu XVII col premiáu poema Pleitu ente Uviéu y Mérida pola posesión de les cenices de Santa Olaya en 1639, nel V Certame de los Xuegos Florales entamaos n'Uviéu con motivu de la proclamación de Santa Olaya de Mérida como patrona de la diócesis asturiana. Esti llibru ye un intentu d'afondar nel conocimientu y analís de la lliteratura d'esti autor tentando de da-y el verdaderu valir, tanto na dómina na que foi escrita como nel conxuntu de la lliteratura asturiana.

Con «La muerte amiya de nueche», Xuan Xosé Sánchez Vicente (Xixón, 1949) ganara’l premiu Xosefa Xovellanos, qu’entá yera de narraciones curties, nel añu 1983. D’entós p’acá muncho tien llovío, pero la obra –una novela negra que val de pretestu p’analizar l’Asturies del momentu y la rellación que la so xente establez pa cola so tierra y les sos espresiones culturales más xenuines– nun perdió un rispiu d’actualidá: l’abandonu d’entós ye l’abandonu de güei pa coles coses de nueso.

«Azurriángamelamelonga» ye una palabra eufónica que s’usaba como señal d’arranque nun xuegu infantil: una de les persones participantes arrancaba detrás de les otres pa da-yos zurriagazos con un trapu.Y xuegu, lliterariu nesti casu, ye esta nueva obra de Xuan Xosé Sánchez Vicente, «Azurriángamelamelonga», cola que ruempe un llargu silenciu creativu n’asturianu. Xuega l’autor a reeditar una obra que ye plural, pero que tien unidá: la que-y da l’espíritu de «dar zurriagazos» metafóricos al personaxe principal de toles histories que nella se cuenten, que nun ye otru que l’espíritu o sencia mesma del ser asturianu: el cainismu.Xuegu lliterariu ye porque tres d’una apariencia d’oralidá y popularidá escuéndese la voz de la erudición que ye, a la fin, a devolver los cuentos tradicionales al orixe: enseñances, entreteníes y amañoses, p’andar pela vida.Xuan Xosé Sánchez Vicente (Xixón, 1949) ye una de les voces de más prestixu na lliteratura asturiana. Cofundador de Conceyu Bable y políticu activu, ye autor d’una amplia obra lliteraria qu’abarca tolos xéneros: poesía («Camín de señardaes. Antoloxía poética 1974-1979», 1980; «Poemes de Xixón», 1981; «De reidores costes», 1988; «...Y de llastientes picos», 1999; y «As de corazon/es/y/es», 2001), narrativa («Cuentos de llingua afilada», 1984; «La muerte amiya de nueche», 1984 –novela–; «Lluna llena», 1990 –volume de relatos–), amás de dellos diccionarios, artículos lliterarios, estudios sobre lliteratura y obres de teatru.

Hai más d’una década que Xuan Xosé Sánchez Vicente nun publica un llibru de poesía. Esti qu'equí presentamos ye una obra de madurez, na que l'autor algama gran altor llíricu y na que'l yo poéticu s'amuesa rescamplante. Ye esta una poesía del sosiegu y de la serenidá que da l'aceptación de la vida y de la muerte. En poemes de corte clásicu que s'allarguen como l'alcordanza, va esgranando Sánchez Vicente los grandes temes de la lliteratura universal, el pasu del tiempu, el amor y la muerte, con versos trescalaos de serena señardá polo perdío y de referencies lliteraries al tiempu que la naturaleza va, a poco y a poco, ganando protagonismu.Xuan Xosé Sánchez Vicente (Xixón, 1949) ye un nome imprescindible de les lletres asturianes: poeta, narrador, dramaturgu y articulista agudu y reflexivu, la so obra, bayurosa y variada, empobina yá'l camín de los clásicos. Asina los sos poemarios «Camín de señardaes» (1980), «Poemes de Xixón» (1981), «De reidores costes» (1988), «...Y de llastientes picos» (1999) y «As de corazon/es/y/es» (2001).