«Investigación sobre les fronteres ente los dominios llingüísticos gallegoportugués y asturllionés na faza más occidental d’Asturies (zona Eo-Navia)»

El presente atles ye’l frutu de quince años de trabayu d’un equipu d’investigadores de la Universidá d’Uviéu, nel marcu del proyectu Estudiu de la Transición Llingüística na Zona Eo-Navia (etlen), acabáu nel 2011.
Trátase d’una investigación sobre les fronteres ente los dominios llingüísticos gallegoportugués y asturllionés na faza más occidental d’Asturies (zona Eo-Navia). Entamáu nel añu 2000, el so oxetivu ye la caracterización de les fales d’esi territoriu garrando como base la tipificación de 368 fenómenos (isogloses) llograos gracies a un cuestionariu diseñáu a costa fecha pal proyectu, con entrevistes realizaes en 40 llugares de la zona. Ye un proyectu dialectográficu (mapes dialectales de carís clásicu), horiométricu (midimientu de la frontera llingüística cola adscripción xeotipolóxica de los trazos diferenciales) y dialectométricu (midimientu de la variación llingüística ente los puntos xeográficos) que quier ofrecer una imaxe muncho más esacta de les característiques llingüístiques de la zona Eo-Navia.

Les descripciones dialeutolóxiques del asturianu faen yá una llarga tradición. Pero, davezu, l'interés fonderu de los fenómenos llingüísticos recoyíos yera la so diferencialidá respeutu del castellanu. D'aende naz un conceutu subsidiariu del sistema asturianu qu'entá ye un enzancu, non sólo pa conocer daveres un sistema gobernáu según les sos propies lleis, sinon tamién pa descubrir, en tola so complexidá, peculiaridaes que paecíen poco atrayibles.
Quiciabes lo más granible d'estes páxines seya'l presentar de mou organizáu y detalláu una mena de fenómenos yá conocíos nes sos llinies básiques. La bayura d'exemplos y la comparanza coles llingües vecines ayudarán a atopar lo que l'asturianu tien a comuña y lo que tien de peculiar.