«Fame d’amor» ye la obra cola que Pablo Rodríguez Medina ganó nel añu 2013 el Premiu «Xosefa Xovellanos» de Novela, que convoca la Conseyería d’Educación, Cultura y Deporte del Gobiernu del Principáu d’Asturies.Concebida como la continuación de «Vivir ensin probalo» (2009), nesta entrega, el protagonista, Casiano Casanueva Rosellana, profesor universitariu, famélicu buscador del amor y la pasión, narra en primer persona los acontecimientos que siguieron al divorciu, los pormenores de la so llaceriosa vida y lo desgraciáu que siempres fora tocante al afectu y al deséu. Novela bien trabada y muncho trabayada, el resultáu ye una narración estructurada en trataos, a la manera de la novela picaresca castellana, densa y lenta, que va llevando al protagonista pelos llugares más inhóspitos de la xeografía asturiana pero tamién pelos requexos más negros de l’alma humana, reflexando les perversiones comunales y individuales d’una sociedá en procesu de descomposición.Pablo Rodríguez Medina (L’Entregu, 1978) ye un escritor de reconocíu prestixu, que se desenvuelve con igual soltura n’asturianu qu’en castellanu. Narrador, poeta y escritor de testos teatrales, tien ganao los premios lliterarios más importantes d’Asturies y una obra publicada bien amplia, de la que destacamos les narraciones «Los paraísos perdíos» (2000), «Los taraos» (2003) o «Vivir ensin probalo» (2009); los poemarios «Nel dialeutu del grisú» (1999), «El color de l’ausencia» (2004) o « La edá de los caminos» (2009) y los testos teatrales «Martema, historia d’una guerra, retratu d’unes culpes» (2003), «Cantu de gaviotes» (2006) o «El santu» (2009).

Premio Internacional de Poesía "Gerardo Diego" 2001.

Con esta obra, que lleva’l suxerente títulu de «Tiempu d’esiliu y povisa ayeno» (en referencia a dos de les tres partes que la componen), ganó Pablo Rodríguez Medina’l Premiu «Vital Aza» de poesía del añu 2000. Esti ye’l segundu llibru de poemes que publica l’autor, un de los escritores mozos más interesantes del panorama lliterariu asturianu.Como yá se dixo, el llibru ta dividíu en tres partes de títulos bien significativos: «Tiempu d’esiliu», «Díes de povisa ayeno» y «El mofu del escaecimientu», que marquen el tonu xeneral de los poemes. La llucha contra’l desarraigu, les ruines que’l tiempu va dexando en nós y, a la fin, l’escaezu que miedra col pasar de los díes son los temes recurrentes d’un poeta sabedor del camín que nos lleva a la destrucción y a la muerte, un poeta que manexa la llingua con axilidá y estilu propiu.L’autor, PABLO RODRÍGUEZ MEDINA, nació nel Entregu en 1978. Diose a conocer como poeta n’asturianu col llibru «Nel dialeutu del grisú» (1999) y un añu depués apaeció’l primer volume de cuentos, «Los paraísos perdíos». Esi añu 2000 recibió un accésit del premiu de novela «Xosefa de Xovellanos» pola obra «Ente semeyances (Na cernada d’un tiempu pasáu)», que tamién acaba d’asoleyar Trabe.Avaláu, pesie a la so mocedá, por munchos premios n’asturianu y castellán, acaba de ganar, ex æquo, el «Xosefa Xovellanos» de novela y l’«Asturias Joven» de poesía.

Nel Amaro nació en Cantuserrón, Mieres, en 1946. Escritor polifacéticu y animador cultural como pocos, d'ente una llarga obra de creación, espardida per revistes y periódicos de toa España, podemos citar los siguientes títulos: «y tú, Marta B., qu'entoncies nun yeres, tampocu, l’Anna Karina de les películes de Jean Luc Godard» (1990), «Diariu de polizón» (1990), «Poemes de San Francisco» (1993) y «Pruebes d’autor»(1994), toos ellos de poesía. Como narrador «¡Adiós Dvorak!» (1990), «Novela ensin títulu» (1991), «Prietu Jazz» (1993), «Na borrina» (1993), «L'últimu del pelotón» (1994) y «¡¡¡Falanxista!!!» (1995). De teatru publicó «Antígona, por exemplu» (1991). Nos postreros años trabaya nel tarrén del esperimentalismu poéticu: poesía visual, performativa, mail-art, instalaciones...

Premio Asturias joven de textos teatrales 2003 Teatro col. Valkenburg

Valiéndose d’una orixinal estructura narrativa, a mediu camín ente la novela clásica y el llibru de cuentos, l’autor va esgranando n’«Ente semeyances» la vida d’un pueblu (Llinares) al traviés de los sos personaxes más emblemáticos, que son, tamién, representativos d’una dómina y d’una manera de vivir que yá nun son les de güei.Nesta obra ye la voz de quien narra, con un característicu y personal estilu mestu y envolvente, la que da xuntura a les distintes partes, faciéndo-y perder a la novela l’aire fragmentariu en favor d’una unidá bien estructurada alrodiu de Cayo Calce, el fotógrafu del ayeri que, coles sos semeyes, fai llegar hasta los díes del narrador un tiempu pasáu y perdíu, nel que la vida yera, malapenes, poco más que desamor, lloviu y desamparu.PABLO RODRÍGUEZ MEDINA (L’Entregu, 1978) ye too un fenómenu lliterariu n’Asturies. A los llibros que tien publicaos n’asturianu, toos con Ediciones Trabe (el de cuentos «Los paraísos perdíos», de 2000, y los de poemes «Nel dialeutu del grisú», de 1999, y «Tiempu d’esiliu y povisa ayeno», del 2001), xunta una llarga relación de premios n’asturianu y castellán de dientro y fuera d’Asturies, que lu fain una referencia obligada na lliteratura d’anguañu. Acaba de ganar, ente más premios, el «Xosefa de Xovellanos» de novela y l’«Asturias Joven» de poesía, con sendes obres n’asturianu.

Nuevu poemariu d'ún de los escritores más prolíficos del panorama lliterariu asturianu, col que ganó'l premiu de poesía "Fernán-Coronas".

Nesti llibru moren los sones de la poesía: el son máxicu de les pallabres, el son rítmicu de los versos y el son sonoru del poema. «Curriverás» recueye un puñáu de poemes pa que los lleas, los disfrutes y hasta los deprendas de memoria, si quieres.

Dende'l primer poemariu n'asturianu que publicara Pablo Rodríguez Medina, «Nel dialéutu del grisú», paecía reclamar pa sigo'l títulu de poeta del orbayu. La estroza d'una tierra, la historia d'un olvidu (el de la llingua, el de la propia identidá, el del tiempu que paez nun correr, que nun paga la pena que pase...) yeren temes recurrentes, tópicos remocicaos al empar que la imaxe de la ceniza que lo llaraba, metáfores de la nada qu'asomaben perdayures nun tonu sentíu, íntimu, elexiacu... Nesta tercer entrega poética, Pablo Rodríguez Medina sigue albidrando el fin caberu y definitivu del so mundu: ensin l'agua que per tolos llaos s'esmuz, ensin el primixeniu elementu de la vida queda la vida ensucha y la palabra erma, queda'l camín n'abertal pal escaezu.Pablo Rodríguez Medina (L'Entregu, 1978) ye, pesie a la so mocedá, ún de los escritores asturianos más fértiles y premiaos. Poeta y narrador, escribe la so obra nes dos llingües d'Asturies: asturianu y castellán.