«La reserva protexida de Les Cuenques» ye'l rellatu de cómo Eleonnor Windstone ve l'Asturies, en concreto'l Mieres de Camín, del primer añu del nuevu sieglu. Y cuéntanoslo de primer mano, yá que trescribe puntu per puntu'l díariu que la reportera foi escribiendo nel tiempu que pasó nesta tierra.

«Si viaxar ye la mio manera de fuxir, va tiempu que toi dau a ello. Fícelo mesmo pa nacer, n'Uviéu en 1958, y non en Morea d'Ayer onde vivía daquella o en Teberga, onde solíen dir a nacer los de casa. Tiempu alantre, fueron crónica d'un viaxe la novela «El cuartu negociu», la serie d'artículos en «Les Noticies», «El raptu d'Europa» y el perdeme per bien de sitios col diariu de rodaxe de «Pídele cuentas al rey» –que titulara «Píde-y cuentes a Quirós»–, por José Antonio Quirós que la dirixera. Como agora lo ye esta «L'Asturies Cismontana», que guarda un poco de crónica de viaxe, de diariu y d'artículu de prensa. Cola intención, la de los viaxes, de siguir faciéndolos y, si fuera mester, volver dar cuenta d'ellos.»

La más grande época de cambios que’l mundu conociera vien dándose estos años: Europa nun va ser la mesma depués de Napoleón. África tampoco depués d’Usuman dan Fodio. Les tierres d’España vuelven a quedar en medio. A esta tierra de naide ocupada poles tropes franceses lleguen los unviaos d’Usuman dan Fodio col propósitu de reconocer el terrenu. Con ellos manda al so propiu fíu. Granada tien de volver a manes de los verdaderos creyentes. Xovellanos ye la clave. Persíguenlu los franceses. Quieren dar con él los musulmanes.Personaxes reales muévense dientro d’esta novela d’Ismael María González Arias. Una hestoria poco conocida, pero que nos afecta directo. Enxamás nunca diba cambiar tanto’l mundu como lo fizo aquellos años. Ganadora del Premiu de Novela «Xosefa Xovellanos» na so convocatoria del 2005, la novela En busca de Xovellanos, devuélvenos al Ismael María González Arias (Uviéu, 1958) contador d’hestories. Dalguién que gusta de percorrer paisaxes conocíos al delláu de personaxes reales pa narrar una hestoria verdadera. Asina, trevesamos Europa y aportamos al corazón de Yugoslavia n’«El cuartu negociu» (1993), ganadora del mesmu premiu trece años atrás, o regresamos a la Teberga de la mocedá na reciente «El tiempu de Manolo» (Ámbitu, 2005), depués de pasar per Uviéu y reínos a la cara de los personaxes estrambóticos y bien conocíos qu’asistieron a «La boda del añu» (Trabe, 2003)._x000D_

Con esta novela Ismael María González Arias ruempe cásique una década de silenciu narrativu. Y failo con una novela orixinal y atrevida, coñona y escarniada.Con superficiales aires de novela rosa –el puntu d’arrinque ye la yá famosa boda d’un vicepresidente asturianu del Gobiernu central allá pelos años finales de la década de los noventa–, «La boda del añu» ye una aceda y descarnada descripción de la realidá social y política d’una Asturies poblada de personaxes faltos de respetu pa consigo mesmos y, por supuesto, pa col pueblu al qu’unos representen y qu’otros formen. Sabe mui bien l’autor evita-y al llector tantu amargor como desprenderíen les páxines d’esta novela si la ironía y la coña más asturiana nun s’apoderaran d’elles. Coña de la que nun se salva naide: nin la estrema isquierda nin la nueva Falanxe (o la vieya Falanxe anovada), nin el sindicatu per escelencia y los sos raros dirixentes, los alcaldinos y los alcaldes, los conceyales y les becaries de los alcaldes... qu’en delles ocasiones, quiciabes pa más escándalu, apaecen con nome y apellíos reales, lo que nun ye otro qu’atrevimientu y da-y orixinalidá a esta novela, crónica social y política d’ún de los episodios más ridículos de la reciente historia d’Asturies.Ismael María González Arias, escritor y periodista, ye amás un apasionáu de la música tradicional asturiana. Col trabayu «L’asturianada» ganó en 1998 el Premiu d’Ensayu Fuertes Acevedo. Como narrador tien publicada la novela «El cuartu negociu» (Premiu xosefa Xovellanos, 1992).

Esta antoloxía de cuentos percuerre cuarenta años de producción lliteraria. Una bona manera d’alvertir cómo cambia la forma d’escribir, d’especial nuna llingua que nos años setenta tenía bien poques referencies en prosa, por nun dicir nenguna.Ismael María González Arias (Uviéu, 1958), xestor cultural y productor musical, escribiera’l so primer rellatu llargu bien d’años más tarde, «El cuartu negociu», qu’obtuviera’l Premiu Xosefa Xovellanos 1992. El mesmu premiu que trece años después algamara con «En busca de Xovellanos».Dellos d’estos cuentos tienlos desperdigaos en distintes publicaciones, pero bona parte d’ellos permanecíen inéditos.