El paisaxe que presenta esta escritora moza aseméyase a esos cuentos onde'l protagonista dexa'l mundu real pa internase, nun se sabe cómo, nel reinu de los seres fantásticos, onde'l tiempu y l'espaciu siguen otres lleis. Nes páxines de «Nome» unes veces ye la naturaleza, cola so medría sobre los restos de la civilización, la que fai separtar l'ámbitu de lo cotidiano y conocío d'esi otru mundu incógnitu y, por eso mesmo, amenazador y atrayente. N'otres ocasiones, ye'l pasu del tiempu y les cultures lo que pon el puntu d'estrañamientu y, a la vez, el filu qu'afilvana planos aparentemente inconexos a lo llargo de la historia. Tamién los suaños, esi camín que tolos díes percuerre l'alma humana hacia les fondures de sí mesmu, revelen nestos rellatos el so poder pa dexar atrás una realidá que non por ser conocida ye más amable.

Les narraciones que tán tres d’esta compilación nun respuenden a vocación histórica o filosófica dala. Nun son más qu’un serviciu de préstamu que fai por dir dibuxando, como pincelaes, les pallabres, esperiencies, emociones, lleendes y paisaxes qu’otres persones yá cuntaron […][…] Asina, a pincelaes d’acuarela, y col mesmu envís épicu que proclamaba Rustichello, descríbense estos llugares que yá formen parte, anotaes nun cuadernu de viaxe, de la llinia vital de la que les escribe.Iris Diaz Trancho (Xixón, 1981) ye maestra y escritora. Conocedora como poca xente del mundu infantil, de so puñu y lletra tien escritos dellos cuentos pa lo más pequeño: «La caxa de cristal» (2005), «La neña de les trences al revés» (2006) y «Vivo nuna casa malva» (2011). Como narradora tien publicáu’l volume de rellatos «Nome» (2011). Miguel Pérez Iñesta (Valladolid, 1980) ye músicu y vive dende hai años en Berlín. Présta-y tamién la danza y siempre-y gustó dibuxar y facer ilustraciones. De poco p’acá realizó dellos cartelos y diseñó’l logu d’un ensame de música contemporánea. Esti ye’l primer llibru qu’ilustra y féxolo muncho contentu y con cariñu asgaya.