Yá cuasi nunca lo facemos por amor. Conciencies mercenaries

Yá cuasi nunca lo facemos por amor. Conciencies mercenaries ye una reflexón sobre’l deterioru d’una profesión, la periodística, na que les sos funciones orixinaries, serviciu públicu y control del poder, somórguiense baxo la dictadura del beneficiu y la propaganda al petite d’intereses privaos. Énte esta situación, nel llibru fálase de la responsabilidá de los y les periodistes nel desempeñu del so oficiu. Al empar, faise un llamáu a la recuperación de la ética humanística y profesional, atalantando que vendese por un platu de llenteyes mal tresnáu nun ye una alternativa. Esta obra obtuvo el XIX Premiu d'Ensayu Máximo Fuertes Acevedo
• Beatriz Redondo Viado (El Remediu, Nava, 1976) ye llicenciada en Ciencies de la Información y en Filosofía. Foi directora del selmanariu Les Noticies y ganadora nel 2003 del Premiu Enriqueta González Rubín de periodismu n’asturianu. Ye autora del llibru xuvenil Qué ye que ye’l Tercer Mundu. Un viaxe del centru a les periferies y coautora d’El país del silenciu, onde se recueyen histories de vida de muyeres asturianes na Guerra Civil. Periodista en procesu de reciclaxe, actualmente collabora en dellos medios de comunicación.