CATALOGO DE OBRAS ARTISTICAS.

Cando a vida se desfai en cinsas e o tempo anda cara atrás é o momento de enfrontarse cun mesmo, co propio pasado, coa constancia dos días e dos feitos. Así o fai o protagonista desta novela de Francisco F. Fernández Naval (Ourense, 1956) que explora as rutas da amizade, do amor e, tamén, ás da súa carencia. O autor de O bosque das antas e Sombras no labirinto, logra contaxiar unha paixon irrefreable, a da busca da identidade.

Dez magníficos relatos constitúen este novo libro de Francisco X. Fernández Naval, que abre con “Noite de pallabarro”, a descuberta adolescente dunha realidade calada, silenciada, que alentaba e confundía un tempo sen memoria histórica; e que pecha con “Para seguir bailando”, un relato que amosa a condición fantástica do cotián nun xogo de múltiples caras, coma o espello de Rafael Dieste, como o reflectir dos cristais do espello. Entre medias, hai oito relatos que fixan os temas das obsesións persoais do autor: o abandono do medio rural, a inxustiza e a corrupción, o abuso exercido sobre a muller e o seu dereito a decidir sobre a súa vida e o seu corpo, o asombroso territorio da sombra ou a reflexión sobre a violencia. Algúns conectan directamente con obras anteriores de Naval pero, en definitiva, o que amosa este libro é a dimensión do ser humano que protagoniza unha existencia normal na que, ás veces, interfire o fantástico ou o azaroso, e sempre, por riba de calquera outra consideración, a certeza de que debemos seguir bailando neste xogo da vida que é, en definitiva, o máis firme valor que posuímos.

¿Quen non ten escoitado da Santa Compaña, da peregrinaxe a Santo Andrés de Teixido ou dos tesouros agochados polos mouros? Sen dúbida, todos nós nalgunha ocasión sentimos estas presencias, igual que lles ocorre ós protagonistas dos relatos de Lendas de onte, soños de mañá. Logo da súa lectura volveremos afirmar, como tantas outras veces, que "as meigas..habelas hainas".

No corazón da fraga dormen os soños dos animais e os dos seres invisibles que, cansos de vagar, veñen descansar a esta fraga.
Debes estar atento e probar os teus dotes de observación se queres coñecer os seres fantásticos que se ocultan nas láminas, agardando que ti os descubras.
Para che facer mais doada a busca, ó final do libro presentámosche algúns destes seres, que xogan connosco a se camuflar entre as árbores, no río, nos penedos, nas montañas, nos camiños... atopalos só depende da nosa capacidade para soñar.